Bylting (1992-)

Bylting

Hljómsveitin Bylting á sér sögu sem nær allt til ársins 1989 þótt ekki hafi hún allan tímann starfað undir sama nafni.

Kjarni sveitarinnar, sem er upphaflega frá Árskógsströnd, hefur starfað saman síðan árið 1989 en það var þó ekki fyrr en 1992 sem hún hlaut nafnið Bylting, áður gekk hún  undir nafninu Strandaglópar.

Meðlimir hennar voru á þessum fyrstu árum þeir Tómas Sævarsson hljómborðsleikari, Bjarni Valdimarsson bassaleikari, Þorvaldur Eyfjörð Kristjánsson gítarleikari, Frímann Rafnsson gítarleikari og Valur Halldórsson trommuleikari, þeir sungu flestallir en Valur var aðalsöngvari sveitarinnar.

Fyrstu árin lék Bylting mestmegnis á heimaslóðum fyrir norðan og einnig eitthvað á austanverðu landinu en árið 1995 fór sveitin að vekja meiri athygli þegar hún gaf út plötuna Ekta. Fyrst höfðu þeir félagar sent frá sér lag á safnplötunni Sándkurl II um sumarið 1995 en um haustið kom breiðskífan út. Hún tekin upp í Stúdíó Hljóðlist á Akureyri undir stjórn Kristjáns Edelstein, var tíu laga og áttu þeir sjálfir meginþorra laganna en Karl O. Olgeirsson samdi reyndar þrjú þeirra, textarnir komu flestir úr ranni Odds Bjarna Þorkelssonar. Platan fór ekki hátt en þrír dómar birtust um hana, hún hlaut ágæta dóma í Degi, sæmilega í DV en fremur slaka í Morgunblaðinu.

Um áramótin 1995-96 urðu þær mannabreytingar í Byltingu að Frímann gítarleikari yfirgaf sveitina, um leið kom Sigfús Óttarsson trommuleikari inn í hana og Valur færði sig frá trommusettinu og sinnti nú söngvarahlutverkinu einvörðungu.

Bylting frá síðara skeiði sveitarinnar

Eftir smá pásu um vorið 1996 fór Bylting af stað á nýjan leik til dansleikjahalds um sumarið, sveitin spilaði nú mun stopulla en áður og veturinn 1996-97 var hún meira og minna í pásu. Eitthvað var tekið upp af efni á þessum tíma en ekki var neitt gefið út.

Bylting hefur starfað nokkuð samfleytt á nýrri öld þó ekki sé sveitin eins áberandi í fjölmiðlaumfjöllun og áður. Sigfús trommari hafði hætt og spilaði Benedikt Brynleifsson með Byltingu um tíma uns Trausti Már Ingólfsson settist við trommurnar. Síðan 2000 hefur Valgarður Óli Ómarsson hins vegar verið trommuleikari sveitarinnar.

Fleiri mannabreytingar hafa orðið í Byltingu, Sumarliði Helgason (Hvanndal) söng lengi með sveitinni sem og Sigursveinn Þór Árnason (Svenni Þór) en Heimir Bjarni Ingimarsson tók við af honum. Frá árinu 2014 hefur Bylting ekki haft fastan söngvara en hinir og þessi hafa sungið með sveitinni eftir atvikum. Eyþór Ingi Gunnlaugsson, Magni Ásgeirsson og Gunnlaugur Helgason eru meðal þeirra en Sumarliði hefur einnig sungið stöku sinnum með þeim félögum í seinni tíð.

Bylting er enn í fullu fjöri og hafa þeir Tómas, Bjarni og Þorvaldur starfað með sveitinni frá upphafi

Efni á plötum