Vor í Vaglaskógi (Kvöldið er okkar)
(Lag / texti: Jónas Jónasson / Kristján frá Djúpalæk)

Kvöldið er okkar og vor um Vaglaskóg.
Við skulum tjalda í grænum berjamó.
Leiddu mig, vinur, í lundinn frá í gær,
lindin þar niðar og birkihríslan grær.
Leikur í ljósum
lokkum og angandi rósum,
leikur í ljósum
lokkum hinn fagnandi blær.

Daggperlur glitra, um dalinn færist ró.
Draumar þess rætast, sem gistir Vaglaskóg.
Kveldrauðu skini á krækilyngið slær.
Kyrrðin er friðandi, mild og angurvær.
Leikur í ljósum
lokkum og angandi rósum,
leikur í ljósum
lokkum hinn þaggandi blær.

[m.a. á plötunni Vilhjálmur Vilhjálmsson – Dans gleðinnar]