Vísur Vatnsenda-Rósu

Vísur Vatnsenda-Rósu
(Lag / texti: Þjóðlag / Rósa Guðmundsdóttir)

Augun mín og augun þín,
ó, þá fögru steina.
Mitt er þitt og þitt er mitt.
Þú veist hvað ég meina.

Langt er síðan sá ég hann;
sannlega fríður var hann.
Allt  sem prýða má einn mann,
mest af lýðum bar hann.

Þó að kali heitur hver,
hylji dali jökull ber,
steinar tali og allt sem er,
aldrei skal ég gleyma þér

Man ég okkar fyrri fund,
forn þótt ástin réni,
nú er eins og hundur hund
hitti á tófugreni.

Trega ég þig manna mest,
mædd af tára flóði,
ó að við hefðum aldrei sést,
elsku vinurinn góði.

[m.a. af plötunni Hamrahlíðarkórinn – Öld hraðans]