Söngflokkur Rauðsokka með Hjördísi Bergsdóttur gítarleikara

Ótrúlega fáar heimildir er að finna um Sönghóp / Kór Rauðsokka, sem þó var nokkuð áberandi á samkomum kvenréttindafólks á áttunda áratugnum.

Í fyrstu var um að ræða lítinn hóp sem gekk undir nafninu Sönghópur Rauðsokka (Sönghópur Rauðsokkuhreyfingarinnar) og kom fyrst fram vorið 1978 en hann var stofnaður upp úr Kór Alþýðumenningar sem þá hafði verið starfandi um skeið. Fljótlega fjölgaði svo um munaði í hópnum og um haustið var farið að kalla hópinn kór, Kór Rauðsokka eða jafnvel Rauðsokkusveitina. Þegar mest var voru á þriðja tug meðlima í kórnum, af báðum kynjum, undir stjórn Ásgeirs Ingvarssonar og var hann nokkuð virkur á tímabili og söng m.a. á tónleikum í Háskólabíói haustið 1978 þar sem Sóleyjarkvæði var flutt. Kórinn gaf einnig út sönglagahefti með um 60 textum.

Kór Rauðsokka starfaði allt til vorsins 1982, með einhverjum hléum þó.