Aðalsteinn Ísfjörð (1947-2022)

Aðalsteinn Ísfjörð

Aðalsteinn Ísfjörð Sigurpálsson (f. 1947) var kunnur húsvískur harmonikkuleikari sem kom víða við í tónlistarsköpun sinni og gaf m.a. út tvær plötur.

Aðalsteinn hóf að leika á harmonikku sjö ára gamall og þrettán ára var hann farinn að leika á dansleikjum í heimabyggð, fyrst með Skólahljómsveit Barnaskóla Húsavíkur og fljótlega með hljómsveit sem bar nafnið GH kvartettinn sem lék jafnframt á almennum skemmtunum og dansleikjum. Harmonikkan var yfirleitt hans aðal hljóðfæri en hann lék svo með ýmsum sveitum norðanlands s.s. Haukum  frá Húsavík, Ólafíu, Bergmál, Stuðlum, Villa, Alla og Halla, Hljómsveit Illuga, Stuðlum, Nefndinni og Víbrum svo einhverjar séu nefndar þar sem hann lék einnig á saxófón en hann lék einnig á sínum tíma í Lúðrasveit Húsavíkur á klarinettu. Aðalsteinn var einn af stofnendum Harmonikufélags Þingeyinga 1978 og var um skeið formaður þess félags, hann kenndi einnig um hríð á harmonikku við tónlistarskólann á Húsavík.

Fyrst lék Aðalsteinn inn á safnplötuna Líf og fjör með harmonikkuunnendum sem út kom 1980 og fjórum árum síðar kom út plata á vegum Pálma Guðmundssonar hjá Tónaútgáfunni á Akureyri, þar sem hann lék á harmonikku ásamt Jóni Hrólfssyni frá Kópaskeri. Þeir höfðu kynnst nokkru áður við vinnu á Raufarhöfn og hlaut plata þeirra titilinn Samspil. Á tíunda áratug síðustu aldar starfaði Aðalsteinn nokkuð með karlakórnum Hreimi og lék hann t.d. undir á plötu með kórnum sem út kom 1999, tveimur árum fyrr hafði hann einnig leikið á plötu sem Harmonikufélag Þingeyinga gaf út.

Aðalsteinn Ísfjörð

Árið 2000 kom út önnur plata með honum en hún heitir í Ásbyrgi en sú plata var öllu blandaðri en fyrri platan, þar komu m.a. við sögu karlakórinn Hreimur, hljómsveitin Gloría og fleiri gestir. Þriðja plata Aðalsteins kom út árið 2007 og bar heitið Sumarstemning en hún kom út í tilefni af sextíu ára afmæli hans, með henni kom út nótnahefti með öllum lögum hans. Fjórða og síðasta plata Aðalsteins kom út 2013 og ber heitið Síðasti séns, þá hafði Aðalsteinn greinst með Alzheimer sjúkdóminn á frumstigi og ákvað hann því að ráðast í gerð plötu með þessu nafni. Hún hefur að geyma efni eftir hann sjálfan auk annarra.

Aðalsteinn kom við sögu á fleiri plötum, s.s. plötu Hljómsveitar Friðjóns Jóhannssonar (2006) en Friðjón hafði einmitt sungið á plötu Aðalsteins frá árinu 2000.

Aðalsteinn samdi sjálfur nokkuð af lögum sem hafa einmitt komið út á plötum hans en einnig hafa lög eftir hann m.a. unnið til verðlauna í lagakeppnum. Tónlistin var Aðalsteini þó meira tómstundagaman en starf þar sem hann starfaði lengst af sem múrarameistari á Húsavík.

Aðalsteinn flutti árið 2005 til Sauðárkróks, tók þar upp hljómsveitarþráðinn að nýju eftir nokkurt hlé og starfaði stundum með hljómsveitinni Von sem gerði m.a. út á árstíðarbundnar samkomur s.s. árshátíðir og þorrablót en Sigurpáll Árni Aðalsteinsson sonur Aðalsteins starfaði með þeirri sveit. Aðalsteinn var jafnframt mjög virkur í harmonikkusamfélaginu á Króknum.

Aðalsteinn Ísfjörð bjó á Sauðárkróki síðustu árin en hann lést sumarið 2022.

Efni á plötum