Kraumsverðlaunahafar 2023

Kraumsverðlaunin, árleg plötuverðlaun Auroru velgerðarsjóðs, voru afhent á KEX í kvöld. Apex Anima, Elín Hall, Eva808, Neonme, Spacestation og ex.girls hljóta Kraumsverðlaunin – árleg plötuverðlaun Auroru velgerðarsjóðs, fyrir plötur sínar. Þetta er í sextánda sinn sem verðlaunin eru veitt.

Kraumsverðlaunin eru veitt fyrir þær íslensku hljómplötur er þykja skara fram úr hvað varðar gæði, metnað og frumleika. Meðal þeirra listamanna sem hlotið hafa verðlaunin síðustu ár má nefna Ásgeir, Daníel Bjarnason, FM Belfast, GDRN, Hildur Guðnadóttir, Hjaltalín, Lay Low, Retro Stefson, Moses Hightower og Sóley.

Verðlaunaplöturnar í ár koma úr ýmsum áttum og spanna meðal annars þjóðlagaskotna popptónlist, drífandi teknó og gítargrúvað rokk – sem m.a. má heyra í verkum Elín Hall, Eva808 og Spacestation. Sú mikla gróska er ríkir hér á landi í rafskotinni og framúrstefnulegri popptónlist er sömueliðis áberandi á plötum ex.girls, Apex Anima (Unnur Andrea Einarsdottir) og Neonme (Salka Valdóttir úr Cyber og Reykjavíkurdætrum).

Kraumsverðlaunum er ætlað að kynna og styðja við plötuútgáfu íslenskra listamanna og hljómsveita. Verðlaunin eru ekki bundin ákveðinni tónlistarstefnu og þeim fylgja engir undirflokkar. Alls hafa hátt í eitt hundrað listamenn og hljómsveitir hlotið verðlaunin fyrir plötur sínar frá því þau voru fyrst veitt árið 2008, flestir snemma á ferli sínum.

Það er Aurora velgerðarsjóður sem stendur að Kraumsverðlaununum. 

Kraumsverðlaunin 2023 hljóta: