Afmælisbörn 19. nóvember 2014

Elsa Sigfúss2

Elsa Sigfúss

Nokkrir eiga afmæli í dag og þar af má finna tvö stórafmæli sellóleikara:

Bryndís Halla Gylfadóttir sellóleikari er fimmtug, hún er með fremstu sellóleikurum landsins og hefur þrátt fyrir klassískan bakgrunn starfað jafnt með klassíska geira tónlistarinnar á Íslandi og þeim poppaðri. Hún hefur leikið inn á fjölmargar plötur í gegnum tíðina, beggja megin línunnar milli klassíkur og léttari tónlistar. Hún hefur einnig gefið út sínar eigin.

Þorbjörg Daphne Hall sellóleikari er þrítug, hún hefur gert garðinn frægan með Hjaltalín en hefur einnig leikið með Drýas. Sellóleik hennar má einnig heyra á plötum annarra flytjenda s.s. Fræ og Bubba Morthens svo dæmi séu nefnd.

Trausti Thorberg Óskarsson gítarleikari lék með ýmsum danshljómsveitum á árum áður, s.s. hljómsveitum Eyþórs Þorlákssonar, Carls Billich og Þóris Jónssonar, auk KK-sextett svo fáeinar séu nefndar, hann er 87 ára gamall.

Elsa Sigfúss söngkona (f. 1908) átti einnig afmæli þennan dag, hún var altsöngkona, starfaði allan sinn feril í Danmörku og er sá Íslendingar sem hefur sungið inn á flestar plötur, á annað hundrað. Elsa lést 1979.