Víkingur Heiðar Ólafsson

Afmælisbörn Glatkistunnar eru þrjú að þessu sinni:

Jón Ingi Valdimarsson bassaleikari Greifanna frá Húsavík er sextíu og eins árs gamall á þessum degi. Jón Ingi hefur verið í Greifunum frá upphafi en sveitin gekk fyrst undir nafninu Special treatment og hefur gefið út fjölda vinsælla laga og platna í gegnum tíðina.

Víkingur Heiðar Ólafsson píanóleikari er fjörutíu og tveggja ára gamall í dag. Víkingur nam í Bandaríkjunum og hér heima, lauk meistaranámi í píanóleik 2008 frá Juillard og hefur unnið til fjölda verðlauna og viðurkenninga fyrir list sína. Hann hefur ennfremur gefið út og leikið inn á plötur, annast tónlistarþáttagerð í sjónvarpi, og rekið eigið útgáfufyrirtæki svo fátt eitt sé nefnt.

Þá hefði kórstjórnandinn og tónmenntakennarinn Sigríður Sigurðardóttir átt afmæli á þessum degi. Sigríður (fædd 1945) hafði m.a. starfrækt ásamt eiginmanni sínum Eddukórinn sem gaf út tvær plötur, áður en þau fluttust á Hvolsvöll þar sem þau rifu upp tónlistarlífið sem stjórnendur Tónlistarskóla Rangæinga. Þar stjórnaði hún m.a. barnakór auk þess sem þau hjónin stofnuðu Samkór Rangæinga. Sigríður lést árið 1996.