Eyþór Rafn Gissurarson

Á þessum degi eru afmælisbörnin fjögur á skrá Glatkistunnar:

Bergsveinn Arilíusson söngvari fagnar fimmtíu og eins árs afmæli í dag, hann var áberandi á árunum fyrir og um aldamótin og söng lengst af með hljómsveitinni Sóldögg en einnig með Pöpum. Áður hafði hann vakið athygli með Ðí Kommittments og Acid juice, og 1993 kom út platan Kærleikur sem hafði að geyma gömul lög sungin af ungum og efnilegum söngvurum, þar söng hann tvö lög. Þá á Bergsveinn eina sólólpötu að baki og söng nú síðast með hljómsveitinni Kolsýru.

Eyþór Rafn Gissurarson á sextíu og tveggja ára afmæli á þessum degi en hann hefur komið víða við á sínum ferli. Hann á að baki eina sólóplötu, Tónbrá sem kom út 2016 en hefur einnig leikið á gítar með fjölmörgum hljómsveitum í gegnum tíðina s.s. Ironside, Grettistaki, Sirka, Baggabandinu og Hljómsveit Sveinbjörns Dýrmundssonar.

Friðbjörn G. Jónsson tenórsöngvari er áttatíu og átta ára gamall í dag. Hann er fæddur í Skagafirðinum en hefur búið syðra mest alla sína ævi, hann söng á sínum tíma með fjölmörgum kórum og kom reyndar hér fyrrum einnig fram sem einsöngvari, m.a. ásamt Sigfúsi Halldórssyni. Þá má heyra söng Friðbjörns á nokkrum plötum, m.a. á breiðskífunni Þar átti ég heima ásamt Hljómsveit Guðjóns Matthíassonar, sem kom út árið 1973.

Og að síðustu er hér nefndur Elfar Berg Sigurðsson píanóleikari (1939-2011) sem átti einnig þennan afmælisdag, hann starfaði einna lengst með hljómsveitinni Lúdó og Stefáni / Lúdó sextett og lék á plötum þeirrar sveitar en starfrækti líka eigin hljómsveitir, Tríó Elfars Berg og Hljómsveit Elfars Berg.

Vissir þú að árið 1989 voru þrjár hljómsveitir frá Akranesi í úrslitum Músíktilrauna?