Hæ, hoppsa-sí!
(Lag / texti: erlent lag / Jónas Árnason)

Viðlag
Hæ, hoppsa-sí, hæ, hoppsa-sa!
Svona, elsku vinur, upp með húmorinn!
Hæ, hoppsa-sí, hæ, hoppsa-sa!
Vertu kátur núna, nafni minn!

Við siglum beint í austurátt
yfir Atlantshafið fagurblátt
og sólin skín á himni hátt.
Vertu kátur núna, nafni minn.

Viðlag

Og seglum skartar gnoðin glatt
eins og glysgjörn snót með nýjan hatt
og ögn hún hallar undir flatt.
Vertu kátur núna, nafni minn.

Viðlag

Og stinnur byr í stögum hvín
eins og strokin séu fíólín
og aldan freyðir eins og vín.
Vertu kátur núna, nafni minn.

Viðlag

Og óðum styttist áfanginn
og að okkur flykkist mávurinn
með gamalkunna sönginn sinn.
Vertu kátur núna, nafni minn.

Viðlag

Og nú rís England upp úr sjó
með sín akurlönd og grænan skóg
og lyfjagrös og lyng í mó.
Vertu kátur núna, nafni minn.

Viðlag

[m.a. á plötunni Þrjú á palli – … eitt sumar á landinu bláa]