Hljómsveitin Hvín starfaði í Hafnarfirði á árunum 1996 og 97, hugsanlega lengur en sveitin var að líkindum hefðbundin ballhljómsveit, hún var auglýst einhverju sinni sem gleðidiskósveit en einnig var einhver misskilningur um sveitina að hún væri Queen coverband og munu einhverjir hafa mætt á dansleik með henni og orðið fyrir vonbrigðum þegar ekkert lag með þeirri mætu sveit var á prógramminu.

Hvín mun mestmegnis hafa leikið í Hafnarfirði, þannig var hún reglulega á A. Hansen en einnig á Vitanum og fleiri stöðum í bænum, þá lék hún í nokkur skipti einnig á Fógetanum. Meðlimir sveitarinnar voru þeir Kristján Orri Sigurleifsson bassaleikari, Jóhann Snorri Sigurbergsson gítarleikari, Ólafur Már Svavarsson söngvari og hljómborðsleikari og Sverrir Þór Sævarsson trommuleikari.