Geir Ólafsson

Fjögur afmælisbörn eru á skrá Glatkistunnar í dag:

Stórsöngvarinn Geir Ólafsson á fimmtíu og tveggja ára afmæli á þessum degi. Geir eða Ice blue eins og hann er oft kallaður, hefur gefið út nokkrar sólóplötur og plötur með hljómsveit sinni Furstunum, sem samanstendur af tónlistarmönnum í eldri kantinum og er eins konar stórsveit.

Hrönn Svansdóttir söngkona á fimmtíu og eins árs afmæli í dag. Hrönn kemur úr gospelgeiranum og hefur verið áberandi t.a.m. í Gospelkór Fíladelfíu, hún hefur sungið inn á fjölmargar plötur og reyndar gefið út eina sólóplötu, Hljóður: við spegilsléttan fjörð, árið 2014.

Daði Georgsson hljóðupptöku- og tónlistarmaður á einnig afmæli en hann er fimmtugur og fagnar því m.a.s. stórafmæli. Áður en Daði sneri sér að upptökuferlinum hafði hann á yngri árum verið hljómborðsleikari í hljómsveitum eins og Áttavillt en einnig í minna þekktum böndum eins og Nova, Riff Reddhedd, Sjáumst í sundi og Dægurlagakombóinu.

Ásta Sveinsdóttir lagahöfundur (fædd 1895) átti einnig afmæli þennan dag. Ásta starfaði lengstum sem tónlistarkennari ásamt öðrum störfum en samdi bæði söng- og dægurlög í frístundum sínum, og kom oft við sögu í dægurlagakeppnum SKT. Hún samdi m.a. lög eins og Bláu augun og Rósin mín. Ásta lést 1973.