Hægt og hljótt (Eurovision – Ísland 1987)
(Lag og texti: Valgeir Guðjónsson)

Kvöldið hefur flogið alltof fljótt,
fyrir utan gluggann komin nótt.
Kertin eru’ að brenna upp,
glösin, orðin miklu meira’ en tóm.

Augnalokin eru eins og blý
en enginn þykist skilja neitt í því
að tíminn pípuhatt sinn tók
er píanistinn sló sinn lokahljóm.

Við hverfum hægt og hljótt út í hlýja nóttina,
hægt og hljótt göngum við heim götuna.
Einu sinni, einu sinni enn.

Eftir standa stólar, bekkir, borð,
brotin glös, sögð og ósögð orð.
Þögnin fær nú loks sinn frið,
fuglar yrka nýjum degi ljóð.

Við hverfum hægt og hljótt út í hlýja nóttina,
hægt og hljótt göngum við heim götuna.
Hægt og hljótt göngum við heim götuna,
hægt og hljótt í gegnum hlýja nóttina.
Einu sinni, einu sinni enn.

[m.a. á plötunni 100 Eurovisionlög: 100 Eurovisionlög á 5 geislaplötum – ýmsir]