Hallbjörn Hjartarson

Óhætt er að segja að skipst hafi á skin og skúrir í lífi Hallbjörns Hjartarsonar en umtalið um hann hefur verið allt frá því að honum sé lýst sem alþýðuhetju sem upp á sitt einsdæmi vakti almenna athygli á kántrítónlist hérlendis með ýmsum hætti og til þess að vera úthrópaður kynferðisafbrotamaður. Því verður hins vegar ekki neitað að tónlistartengdur ferill hans var ótrúlegur, hann gaf út fjölda hljómplatna með frumsaminni kántrítónlist og vakti með henni almenna athygli á slíkri tegund tónlistar, hann stofnaði og starfrækti veitinga- og skemmtistaðinn Kántríbæ, setti á laggirnar kántríhátíð í heimabæ sínum og starfrækti um árabil útvarpsstöð með kántrítónlist.

Hallbjörn Jóhann Hjartarson fæddist vorið 1935 í Höfðakaupstað sem í dag kallast Skagaströnd, hann var yngstur sextán systkina og var tónlist nokkuð iðkuð á heimilinu enda hafði faðir hans leikið á harmonikku á dansleikjum í sveitinni. Hallbjörn hóf ungur að nema tónlist, lærði á orgel sjö eða átta ára gamall en spilaði þó mestmegnis eftir eyranu. Hann var farinn að semja gamanvísur innan við fermingu og fljótlega eftir það fór hann að syngja á dansleikjum og spila með bræðrum sínum en hann lék á ýmis hljóðfæri s.s. gítar, orgel, harmonikku og saxófón. Þegar hann var sextán ára gamall fór hann suður til Reykjavíkur en menn í Höfðakaupstað höfðu þá vonir um að hann myndi læra á orgel til að gerast organisti þorpsins, eitthvað varð lítið úr orgelnáminu en Hallbjörn lærði þess í stað á píanó og hljómfræði í tvo vetur hjá þeim Karli Runólfssyni, Victor Urbancic og Jóni Nordal.

Á árunum sem hann bjó fyrir sunnan vann hann á sumrin hjá varnarliðinu á Keflavíkurflugvelli og þar kynntist hann kántrítónlistinni fyrst en hún átti eftir að móta tónlistarsmekk hans, hann kom eitthvað fram sem söngvari um það leyti – t.d. á Vellinum ásamt Elísabetu Kristjánsdóttur en einnig með hljómsveit Carls Billich í Tívolí og hljómsveit Svavars Gests í Breiðfirðingabúð meðal ungra og efnilegra dægurlagasöngvara sem þar voru kynntir, þá kom hann einnig fram á tónleikum eða kabarettsýningu sem Tage Ammendrup stóð fyrir í Austurbæjarbíói. Þar mun Svavar Gests hafa séð hann í fyrsta sinn syngja frumsamið lag og það hjálpaði til síðar þegar hann gaf út fyrstu plötu Hallbjörns.

Hallbjörn kynntist verðandi eiginkonu sinni á Reykjavíkur-árunum og þegar þau fluttust norður til Skagastrandar hófst tímabil þar sem hann vann ýmis störf, var í verslunarrekstri, við fiskvinnslu og fleira en var lítið í tónlist framan af, hann var reyndar að syngja í kirkjukórnum á staðnum og söng m.a.s. einsöng með kórnum en í upphafi áttunda áratugarins var hann í ballsveit sem bar nafnið Villikettir og stöku sinnum skemmti hann með gamanvísnasöng þar sem hann lék sjálfur undir á píanó – m.a. á Húnavöku, hann var jafnframt virkur í félagslífi Skagstrendinga og tók yfirleitt fullan þátt í starfsemi leikfélagsins í þorpinu.

Það var svo um miðjan áttunda áratuginn sem tónlistin varð meira áberandi í lífi hans og hann varð þekktur utan heimabyggðarinnar, áðurnefndur Svavar Gests hafði auglýst eftir lagahöfundum til að gefa út hjá útgáfufyrirtæki hans SG-hljómplötum og þegar Hallbjörn sendi honum nokkur lög á segulbandi bað Svavar um fleiri slík og úr varð að platan Hallbjörn syngur eigin lög kom út á vegum SG árið 1975, textarnir voru eftir feðgana Kristján Hjartarson (bróður Hallbjörns) og Rúnar Kristjánsson en þeir áttu eftir að semja síðar marga texta fyrir Hallbjörn. Platan seldist ekki ýkja mikið en lögin á henni voru svolítið dæmigerð fyrir þá tónlist sem þá var í gangi, Jón Sigurðsson (Jón bassi) annaðist útsetningar og stjórnaði hljómsveitinni sem lék á plötunni.

Hallbjörn árið 1975

Lítið gerðist frekar í útgáfu- og tónlistarmálum Hallbjörns næstu árin, hann starfaði þó með hljómsveitum eins og Sundrungu og Gallon en svo kom að því að hann setti sig í samband við Jón bassa og bað hann um að útsetja fyrir sig lög sem hann hugðist gefa út á plötu, Jóni fannst lögin bera keim af kántríi og stakk upp á því að platan yrði í kántrístíl – sem síðan varð. Platan var hljóðrituð í Stúdíó Stemmu, hljóðveri Sigurðar Rúnars Jónssonar (Didda fiðlu) sonar Jóns veturinn 1980-81 og kom svo út í kjölfarið og hlaut nafnið Kántrý lög, hún átti síðar eftir að ganga undir nafninu Kántrý 1. Ekki fór mikið fyrir útgáfu plötunnar en hún er að mörgu leyti tímamótaplata í íslenskri tónlistarsögu sem fyrsta sólóplatan sem hafði að geyma svokallaða kántrítónlist og Hallbjörn var þá um leið fyrsti kántrísöngvarinn. Það er þó varla hægt að segja að um hreint amerískt kántrí sé að ræða, heldur miklu fremur blöndu þess og íslensks dreifbýlispopps þess tíma. Í blaðaviðtali kvaðst Hallbjörn eiga þann draum að platan kæmi út á ensku í Bandaríkjunum og var hann kominn með íslenskan tengil vestra sem átti að opna leiðina fyrir þá útgáfu, aldrei heyrðist þó meira um það. Hallbjörn gaf plötuna út sjálfur og fljótlega seldist 1100 platna upplag hennar upp sem og stór hluti kassettu upplagsins og því var nýtt upplag framleitt en hún seldist samtals í um 2000 eintökum.

Hallbjörn kom suður til Reykjavíkur til að fylgja plötunni eftir, og kom hann nokkuð fram á skemmtistaðnum Óðali þar sem hann flutti lögin. Hann fór ekki alveg hefðbundna leiðir og ýmsum þótti hann hreyfa sig full nautnalega í flutningnum og reyndar varð eitthvert fjaðrafok vegna þess.

Ágætt gengi plötunnar og athyglin sem Hallbjörn fékk í kjölfar útgáfu hennar varð honum hvati til frekari verka, hann hóf að koma fram í auknum mæli sem eins konar kántrísöngvari og hvort sem fólk tók honum sem einhverju gríni eða ekki nýtti hann sér óspart athyglina, hann hóf að leggja drög að veitingastað á Skagaströnd sem opnaði sumarið 1982 undir nafninu Kántríbær, hann fékk fljótlega vínveitingaleyfi og hóf upp frá því að sinna þeim rekstri í fullu starfi og hætti þá verslunarrekstri sem hann hafði áður verið í. Jafnframt hóf hann að vinna að útgáfu nýrrar plötu en hann hafði í blaðaviðtali sagt að hann ætti um tvö hundruð lög á lager.

Nýja platan kom út vorið 1983 og bar titilinn Kántrý 2, á henni samdi Hallbjörn flest lögin sjálfur en Jóhann G. Jóhannsson átti einnig tvö lög – textarnir komu úr ýmsum áttum en Hallbjörn átti sjálfur nokkra slíka. Hér fóru hjólin að snúast hraðar og Hallbjörn fór víðar en áður til að kynna plötuna, á höfuðborgarsvæðinu skemmti hann t.a.m. á Broadway, Óðali og Hollywood við nokkrar vinsældir og einnig fór hann til Akureyrar, Borgarness og víðar í sama tilgangi, þá skemmti hann á þjóðhátíð í Vestmannaeyjum um verslunarmannahelgina en það átti hann eftir að gera í nokkur skipti síðar. Einnig kom hann í nokkur skipti fram á hestbaki, m.a. sem skemmtiatriði á knattspyrnuleikjum og jóðlaði jafnvel en það gerði hann einmitt á plötunni. Fyrsti vinsældasmellur Hallbjörns var á plötunni en það var lagið Kántrýbær – sem þá um leið varð eins konar einkennislag (og auglýsing) samnefnds veitingastaðar í eigu Hallbjörns. Hróður hans jókst við vinsældir lagsins og e.t.v. mætti segja að lítið kántríæði hafi gripið um sig en tónlistina mætti e.t.v. flokka undir það sem síðar kallaðist hamfarapopp, í kjölfarið voru stofnaðir nokkrir aðdáendaklúbbar víða um land. Blaðamaður Dags á Akureyri skaut þó líklega yfir markið þegar hann vildi meina að líkja mætti þessu við Bítlaæðið þegar söngvarinn skemmti unglingum í Dynheimum á Akureyri.

Hallbjörn Hjartarson

Þrátt fyrir vinsældir Hallbjörns gekk salan á plötunni ekki eins vel og hann hafði ætlað og sömu sögu var að segja af rekstri Kántrýbæjar, veitingastaðurinn var einungis opinn yfir sumartímann og hálfgert happdrætti var hvort eitthvað var að gera þar, þannig gat veðrið spilað þar stóra rullu. Hallbjörn hélt þó áfram ótrauður að skemmta og þegar hann var í tónleikaferð um Norðurland sumarið 1984 kom einnig fram með honum Húsvíkingurinn Jón Víkingsson sem tók sér nafnið Johnny King. Þeim Hallbirni og Johnny King var gjarnan þetta sumar stillt upp sem keppinautum sem þeir voru alls ekki enda áttu þeir eftir að sameinast um að halda þessari tónlistarstefnu á lofti og kynna hana næstu árin, Jón átti t.a.m. eitt lag og tvo texta á næstu plötu Hallbjörns sem hljóðrituð var í Stúdíó Bimbó á Akureyri og kom svo út á vegum þess, Hallbjörn hafði þá gefið út að þrír aðilar hefðu boðið til að gefa hana út. Ýmsir kunnir akureyskir tónlistarmenn komu við sögu á plötunni sem hlaut nafnið Kántrý 3, og hér má nefna Ingimar Eydal og Snorra Guðvarðarson en sá síðarnefndi annaðist einnig útsetningar á plötunni. Platan kom út um sumarið og þar var að finna nýjan stórsmell, lagið Lukku Láki sem naut töluverðra vinsælda um sumarið og komst ofarlega á vinsældarlista Rásar 2.

Nú hófst eins konar kúreka- eða kántrívakning norðanlands því auk þeirra Hallbjörns og Johnny King spratt nú fram á sjónarsviðið Akureyringurinn Siggi Helgi en þríeykið kom fram á kántríhátíð sem Hallbjörn hélt á Skagaströnd síðari hluta júlímánaðar 1984 með tilheyrandi kúrekaatriðum, ródeói og þess háttar auk dansleikja og annarra skemmtana, og þar var einnig sett á laggirnar útvarpsstöð sem varð eins konar undanfari Útvarps Kántrýbæjar. Á kántríhátíðina mættu um 8-900 manns og einnig kvikmyndagerðamaðurinn Friðrik Þór Friðriksson sem gerði heimildarmynd um hátíðina, sem síðar hlaut nafnið Kúrekar norðursins. Reyndar var þetta ekki eina kvikmyndin sem Hallbjörn kom við sögu í þetta sumar því hann birtist einnig í Dalalífi Þráins Bertelssonar sem frumsýnd var fyrr um sumarið. Kúrekar norðursins hlaut blendnar viðtökur, mörgum fannst hún hroðvirknislega unnin og sýna Hallbjörn og félaga hans í spaugilegu ljósi en hún hefur með tímanum þótt merkileg heimild um þessa kántrívakningu sem Hallbjörn óneitanlega átti langstærstan hluta að. Plata með tónlist úr myndinni kom jafnframt út, hún hlaut ágæta dóma í Morgunblaðinu en almennt fremur slaka og NT átti líklega neikvæðasta dóminn undir fyrirsögninni „Lélegasta plata ársins 1984“.

Minna fór fyrir Hallbirni næsta árið eða svo, aftur var haldin kántríhátíð í júlíbyrjun 1985 en þá mættu aðeins um 600 manns og nokkurt tap varð á hátíðinni, Hallbjörn var ekki par sáttur við heimamenn en fæstir þeirra sýndu hátíðinni áhuga og hvað þá að þeir fengjust til að starfa með honum á henni – á þeirri hátíð bar helst til tíðinda að henging Johnny King var sviðsett. Í kjölfarið fór Hallbjörn að koma meira fram opinberlega til að skemmta og var tilgangurinn líklega sá að vinna upp tapið á kántríhátíðinni, m.a. kom fram hann á útihátíð í Borgarfirði um verslunarmannahelgina. Síðsumars bárust þær fregnir að Hallbjörn hygðist flytja suður og gera út frá höfuðborgarsvæðinu, illa gekk hins vegar að selja húsnæðið (Kántrýbæ) og setti það honum nokkrar skorður. Hann var hins vegar mikið í Reykjavík um haustið þar sem hann hljóðritaði nýja plötu með Sigurði Rúnari Jónssyni, um það leyti sem upptökum lauk lenti Hallbjörn hins vegar í alvarlegu umferðarslysi í Reykjavík og slasaðist hann mikið. Platan, sem bar heitið Kúreki á suðurleið kom út fyrir jólin þrátt fyrir allt en eðlilega náði Hallbjörn ekki að fylgja henni eftir með neinum hætti, hún hlaut ágæta dóma í DV.

Hallbjörn Hjartar 1981

Hallbjörn var allan veturinn 1985-86 frá vegna slyssins og var lengi að jafna sig eftir það, reyndar jafnaði hann sig aldrei almennilega og glímdi við þunglyndi í framhaldinu. Áfallið leiddi ennfremur til þess að hann lenti í fjárhagskröggum, missti húsnæðið þar sem Kántrýbæ var til húsa og var áfram heima á Skagaströnd þar sem hann dró sig í hlé og starfaði við annað næstu misserin. Það má því segja að Hallbjörn hafi horfið alveg af sjónarsviðinu allt til ársins 1989 þegar hann birtist á nýjan leik eftir langt hlé, þá hafði hann ákveðið að gefa út plötu til styrktar barnabarni sínu sem lent hafði í slysi og misst heyrnina en plötuútgáfan átti að styrkja barnið til aðgerðar svo það fengi bót meina sinna. Hann reif sig því upp úr þunglyndinu fullur af baráttuvilja og hóf að skemmta á nýjan leik, hann var einnig með útvarpsstöð þegar Skagaströnd fagnaði 50 ára afmæli sínu um sumarið 1989 og þar var hann duglegur að kynna lögin á fyrirhugaðri plötu sinni og skemmti jafnframt á þeirri hátíð. Platan kom út um haustið og hét Kántrý 5: Með kveðju til þín.

Tilgangur Hallbjörn með útgáfu plötunnar höfðaði til landans og hún seldist prýðilega, um 1200 eintök seldust í fyrstu vikunni og síðan kom JC hreyfingin einnig að sölu plötunnar sem samtals seldist í um 4000 eintökum og fékk aukinheldur ágæta dóma í Morgunblaðinu. Hallbjörn fór að koma meira fram í kjölfarið og ekki skemmdi fyrir að á henni var að finna lagið Hann er vinsæll og veit af því, sem fjallaði um Steingrím Hermannsson þáverandi forsætisráðherra og víst er að víða var sungið þetta sumar: Hann er vinsæll og veit af því / leggur víða á hluti mat / Lyftir Gorba á gullið ský / gerir perlu úr Arafat.

Með þessari plötu komst Hallbjörn af stað á nýjan leik og skemmti heilmikið um veturinn á höfuðborgarsvæðinu, m.a. í Danshúsinu í Glæsibæ og svo á Skálafelli. Velgengnin varð honum einnig hvati til að láta draum um að taka upp kántríplötu í Bandaríkjunum rætast en þangað fór hann sumarið 1990 ásamt Vilhjálmi Guðjónssyni og Magnúsi Kjartanssyni, og hljóðritaði plötu í Omni sound recording studios í Nashville í Tennessee með ærnum kostnaði en einnig komu nokkrir þarlendir tónlistarmenn við sögu á plötunni.

Platan kom út um haustið undir titlinum Kántrý 6: Í Nashville og um svipað leyti kom út bók um Hallbjörn sem var skráð af Páli Ásgeiri Ásgeirssyni undir nafninu Hallbjörn – kúreki norðursins. Plata og bók var e.t.v. of mikið fyrir markaðinn og þó að platan seldist þokkalega í byrjun þá datt salan fljótlega niður og stóð engan veginn undir kostnaði. Hún hlaut þó ágæta dóma í Morgunblaðinu og Þjóðviljanum og þar var t.d. að finna lagið um Hundinn Húgó sem naut nokkurra vinsælda, annað lag sem átti að höfða til fjöldans eins og lagið um Steingrím náði hins vegar ekki vinsældum en það hét Davíð frændi og fjallaði um Davíð Oddsson.

Hallbjörn í Kántrýbæ

Hallbjörn lét ekki deigan síga þó platan seldist minna en hann átti von á, hann hélt áfram að skemmta og kom m.a. eitthvað fram með hljómsveitinni Lexíu um veturinn. Hann hafði misst Kántrýbæ á sínum tíma og húsnæðið sem var í niðurníðslu hafði verið notað sem geymsla um nokkurra ára skeið en árið 1991 eignaðist Hallbjörn húsið aftur, gerði það upp og opnaði staðinn á nýjan leik og var ætlun hans að hafa kántrísafn einnig í húsinu enda var Hallbjörn eins konar samnefnari fyrir sögu kántrítónlistarinnar á Íslandi. Hann var sjálfur ekki endilega á þeim buxunum að gefa út fleiri plötur en reiknaði þó með að safnplata með lögum hans kæmi einhvern tímann út. Vorið 1992 opnaði svo Kántrýbær á nýjan leik eftir sex ára hlé og um haustið startaði hann útvarpsstöð – Útvarp Kántrýbær sem helguð var eingöngu kántrítónlist en stöðin mun vera fyrsta sérhæfða útvarpsstöðin hér á landi og markar því tímamót í íslenskri útvarpssögu. Framan af var einungis útvarpað um helgar en smám saman lengdist útsendingartíminn og annaðist Hallbjörn að mestu sjálfur alla dagskrárgerð. Hann einbeitti sér að útvarpstöðvarekstrinum sem þó gaf aldrei neitt í aðra hönd og var því eingöngu hugsjónastarf alla tíð, hann kom þó eitthvað fram til að skemmta næstu árin og birtist m.a. í sjónvarpsþættinum Á tali með Hemma Gunn og svo á Kántrýhátíð sem hann hélt sumarið 1994. Það sama ár hlaut Hallbjörn styrk frá Verkalýðsfélagi Austur-Húnvetninga, eins konar bjartsýnisverðlaun og um haustið kom út safnplatan Kántrý 7: Það besta, hún hlaut góða dóma í Morgunblaðinu og ágæta í DV en platan hafði að geyma lög frá kántríferli hans frá árunum 1981 til 92.

Árið 1995 var Kántrýhátíðin enn og aftur haldin á Skagaströnd en Hallbjörn kom þá að henni í samstarfi við sveitarfélagið sem loksins sá að hreppurinn gæti hagnast á slíkri samkomu, hátíðin sem að hluta til fór fram í Kántrýbæ var nú með nokkru öðru sniði en þarna var farið að leggja meiri áherslu á hana sem fjölskylduhátíð enda mættu um 1100 mann á hana. Hallbjörn kom fram á hátíðinni og söng en hafði sig að öðru leyti lítið í frammi enda var veitingahúsa- og útvarpsreksturinn honum meira hjartans mál á þessum tíma.

Á næstu árum var mest allt við sama keip en árið 1997 sendi Hallbjörn frá sér plötu með trúarlegri gospel- eða kántrítónlist en hann hafði alltaf verið trúaður og haft stuðning af drottni þegar mótlætið var sem mest, hann hafði einnig alltaf verið í kirkjukórnum á Skagaströnd auk þess sem hann hafði um tíma gegnt starfi meðhjálpara við kirkjuna á staðnum. Þeir félagar, Vilhjálmur Guðjónsson og Magnús Kjartansson voru honum innan handar við gerð plötunnar auk þess sem fleiri nafntogaðir tónlistarmenn komu við sögu og gerð hennar, platan – Kántrý 8: Konungur kántrýsins fékk góða dóma í Morgunblaðinu.

Enn eitt áfallið dundi yfir um haustið fáeinum vikum eftir að platan kom út, bruni varð í Kántrýbæ með þeim afleiðingum að allt eyðilagðist innan dyra og þar með talið allur búnaðurinn tengdur Útvarpi Kántrýbæjar. Þetta varð Hallbirni eðlilega mikið högg og sagði hann í blaðaviðtölum að helst hefði hann vilja brenna inni enda ágerðist þunglyndið enn frekar við þetta áfall. Almenningur var þó síður en svo búinn að gleyma Hallbirni og því sem hann hafði gert til að stuðla að framgangi kántrítónlistar á Íslandi og í kjölfarið fóru af stað safnanir og ýmis styrktarverkefni til að koma Kántrýbæ og Útvarp Kántrýbæ á flot aftur. Þetta varð honum hvati til að halda starfi sínu áfram, bjálkahús var pantað frá Finnlandi fyrir söfnunarfé og var reist á sama stað og gamli Kántrýbær hafði staðið og fjögur þúsund manns mættu á Kántrýhátíðina á Skagaströnd um verslunarmannahelgina 1998 sem haldin var fyrir fulltingi sveitarfélagsins – um það leyti var brjóstmynd af kántríkónginum afhjúpuð með viðhöfn.

Hallbjörn í Tennessee

Og hróður Kántrýhátíðarinnar jókst, árið 1999 voru á milli fimm og sex þúsund manns sem mættu á hana og þeim átti enn eftir að fjölga árið eftir þegar um tíu þúsund manns skemmtu sér á Skagaströnd en hátíðin slagaði þá hátt í þann fjölda sem mætti á Þjóðhátíð í Eyjum. Metið var þó ekki slegið fyrr en um verslunarmannahelgina 2001 þegar um tólf þúsund gestir mættu á Kántrýhátíð á Skagaströnd. Hallbjörn hlaut nokkrar viðurkenningar fyrir starf sitt á þessum tíma og t.a.m. hlaut hann hvatningarverðlaun Iðnþróunarfélags Norðurlands vestra fyrir uppbyggingu Kántrýbæjar og Kántrýhátíðina sem laðaði að þúsundir manna. Sjálfur var Hallbjörn lítið að skemmta, þrátt fyrir alla velgengnina var þunglyndið að hrjá hann á stundum en þess á milli kom hann fram t.d. á Country festival hátíðinni á Broadway. Útvarpsreksturinn gekk heldur ekki sem skyldi, sem fyrr var öll sú vinna hugsjónastarf rekið án auglýsingatekna og á sama tíma lenti Hallbjörn í vandræðum með að standa í skilum við STEF, það fór svo að lokum að útvarpsstöðin hætti um tíma vegna þeirra skulda.

Fyrir jólin 1999 hafði komið út safnplata með lögum Hallbjörns sem bar nafnið Kántrý 9: Golden memories sem fór reyndar ekki hátt en sumarið 2002 kom svo út platan Kúrekinn sem gefin var út honum til heiðurs en á henni sungu fjölmargir þekktir tónlistarmann lög Hallbjörns í sínum útsetningum. Þar má nefna Möggu Stínu, Hreim Örn Heimisson, KK & Magnús Eiríksson, Helga Björnsson, Margréti Eir og Dr. Gunna en sá síðst taldi söng lagið um Hundinn Húgó með sínu lagi og naut það nokkurra vinsælda. Kántrýkóngurinn sjálfur varð þó ekki ýkja hrifinn af tiltækinu og vildi lítið tjá sig um það enda hafði aldrei neitt samráð verið haft við hann um útgáfu plötunnar. Enn ein platan kom út með Hallbirni sumarið 2003, Kántrý 10: Kötturinn Búlli en þar naut hann aðstoðar þeirra Vilhjálms Guðjónssonar og Magnúsar Kjartanssonar sem oft höfðu komið að plötunum hans, auk þeirra léku nokkrir aðrir þekktir tónlistarmenn á plötunni. Titill plötunnar hafði skírskotun í nafn á ketti sem Hallbjörn hafði einhverju sinni átt.

Smám saman dró Hallbjörn sig í hlé frá tónlistinni, þunglyndið hafði þar sitt að segja en ekki má heldur gleyma því að hann var þarna kominn fast að sjötugu og að fyrsta plata hans frá árinu 1975 hafði komið út þegar hann var fertugur þannig að allan hans frægðaferil ef svo mætti að orði komast, var hann á fimmtugs-, sextugs og sjötugsaldri og fjarri því að vera nokkurt unglamb. Hann rak þó útvarpsstöðina með hléum en alls kyns tæknilegir og fjárhagslegir hnökrar trufluðu þær útsendingar, að lokum var stöðin komin á Internetið og starfaði þar um tíma. Útvarp Kántrýbær var staðsett í Kántrýbæ sem fyrr en tengdasonur Hallbjörns hafði tekið við rekstri veitingastaðarins, hann setti á fót safn um sögu kántrísins á Íslandi og um leið um Hallbjörn.

Aðrir héldu nafni Hallbjörns nokkuð á lofti, áður er minnst á plötuna Kúrekinn og árið 2004 var kántríkóngurinn Viðari Jónssyni að yrkisefni í laginu Kúrekinn á plötu Viðars, og ári síðar (2005) heiðruðu fyrrum kántrífélagar Hallbjörns hann, – þeir Siggi Helgi og Johnny King, með plötunni Aftur á bak: Í anda Hallbjarnar, þar voru þeir félagar undir nafninu Kúrekar norðursins.  Fjölmargir aðrir hafa jafnframt gert sínar útgáfur af lögum Hallbjörns og hér má nefna Papa, Brim, Glófaxa og hljómsveitina Undur og Hljómsveit Svanhildar svo nokkur dæmi séu nefnd.

Hallbjörn Hjartar

Hallbjörn hafði hlotið nokkrar viðurkenningar fyrir starf sitt sem fyrr er getið, og þær áttu fleiri eftir að bætast við – árið 2006 hlaut hann viðurkenningu frá Markaðsstofu ferðamála á Norðurlandi fyrir Kántrýbæ og árið 2012 fékk hann viðurkenningu frá bandaríska sendiráðinu á Íslandi og Country Music Association fyrir framlag sitt við að kynna og auka veg kántrítónlistarinnar á Íslandi. Kántrýhátíðin var haldin eitthvað áfram á Skagaströnd en Hallbjörn sjálfur kom ekki að henni, og var reyndar ósáttur við að sveitarfélagið skyldi halda hana án hans aðkomu – en áður hafði hann einnig verið ósáttur við það þegar sveitarfélagið hætti að halda hátíðina á sínum tíma.

Segja má að skin og skúrir hafi skipst á á tónlistarferli Hallbjörns, velgengni hans má rekja til þeirrar kántrítónlistar sem hann samdi og gaf út þótt sjálfsagt mætti halda því fram að hluti vinsælda hans hafi verið tengt gríni á hans kostnað, Hallbjörn naut þó og nýtti sér alla athyglina og gerði margt sem öðrum hefði varla hugkvæmst s.s. að halda Kántrýhátíðina á Skagaströnd, og reka Kántrýbæ og Útvarp Kántrýbæ. Áföll eins og bílslys, bruni og almennt sinnuleysi annarra gagnvart þeim verkefnum sem brunnu á honum urðu hins vegar til að draga úr honum og e.t.v. átti þetta sinnuleysi annarra sér rætur í að hann átti í erfiðleikum með samskipti við fólk. Því verður þó ekki neitað að hann fékk miklu áorkað hvort sem menn líta á hann sem mikilvirkan tónlistarmann, kynlegan kvist eða hamfarapoppara, það eitt og sér segir heilmikið að hann sendi frá sér ellefu plötur með um hundrað og fimmtíu lögum og fjölmörgum textum.

Árið 2013 bárust fregnir af því að Hallbjörn hefði orðið fyrir fólskulegri árás ungmenna á heimili sínu og kom þá upp úr kafinu að hann hafði misnotað drengi kynferðislega og var hann ákærður í kjölfarið og hlaut þriggja ára dóm, hann sat þó aldrei inni vegna þess sökum aldurs.

Hallbjörn Hjartarson lést haustið 2022.

Efni á plötum