Jón Hallfreð Engilbertsson

Afmælisbörn dagsins eru fimm að þessu sinni:

Hörður Áskelsson kórstjórnandi og organisti er sjötíu og eins árs í dag. Hörður var stofnandi Mótettukórs Hallgrímskirkju og Schola Cantorum sem hafa gefið út fjölda platna, hann var ennfremur organisti Hallgrímskirkju í áratugi og hefur leikið á og gefið út plötur einn og í samstarfi við aðra, auk þess að hafa leikið á plötum annarra listamanna. Þá hefur hann hlotið fjölda viðurkenninga fyrir störf sín í tónlistinni, s.s. fálkaorðuna, verið borgarlistamaður og margt fleira.

Þá er trymbillinn Páll Böðvar Valgeirsson sjötíu og fimm ára gamall í dag. Páll var trommuleikari í nokkrum sveitum á sínum yngri árum en þekktust þeirra var án nokkurs vafa Sextett Ólafs Gauks sem hann lék með í þrjú á blómaskeiði þeirrar sveitar, þá hann lék hann einnig með sveitum eins og Tempó, Fífí og Fófó og Los Banditos

Ásgeir Jónsson söngvari og gítarleikari sem þekktastur var fyrir að vera söngvari Bara-flokksins frá Akureyri átti einnig þennan afmælisdag en hann lést árið 2022. Ásgeir, sem var fæddur á þessum degi árið 1962 starfaði lengi við plötuupptökur og hljóðblöndun og lék einnig á gítar á nokkrum plötum auk þess að syngja. Meðal annarra hljómsveita sem Ásgeir starfaði með má nefna Góðkunningja lögreglunnar og Síhanouk.

Guðrún Ágústsdóttir (f. 1897) hefði einnig átt afmæli á þessum degi en þessi sópransöngkona var með fyrstu óperusöngkonum okkar Íslendinga, hún tók þátt í fyrstu óratoríunni sem sett var á svið á Íslandi og söng í tilraunaútsendingum útvarps fyrir 1930. Hún lést árið 1983.

Þá hefði Jón Hallfreð Engilbertsson átt afmæli þennan dag en hann lést fyrr á þessu ári. Jón Hallfreð var áberandi í vestfirsku menningarstarfi og lék aðallega á gítar þó flest hljóðfæri léku í höndum hans, hann lék með hljómsveitum eins og Ömmu tiktúru, Gancia, Gabríel, Tríó 72, Dúett ´73 og Hljómsveit Ásgeirs Sverrissonar og var jafnframt öflugur laga- og textahöfundur.

Vissir þú að Stefán Karl Stefánsson og Gísli Rúnar Jónsson unnu saman plötuna Í túrett og moll árið 2009?