Edda Þórarinsdóttir

Afmælisbörn Glatkistunnar eru fjölmörg á þessum degi eða ellefu talsins:

Ásgerður Flosadóttir er sjötíu og tveggja ára gömul í dag. Ásgerður var þekktust fyrir framlag sitt á plötu Samsteypunnar sem út kom 1970 og hafði m.a. að geyma lagið Friður á jörð (Give peace a change). Hún hefur lítið verið viðloðandi tónlist seinni ár.

Jóhann Davíð Richardsson trommuleikari er sextíu og tveggja ára gamall á þessum degi. Jóhann gekk lengstum undir nafninu Jói Motorhead og lék á trommur í hljómsveitum eins og Egó, Q4U, Seiðbandinu, Flames of hell og Mogo homo.

Samúel Jón Samúelsson básúnuleikari er fimmtíu og tveggja ára gamall í dag. Samúel hefur komið víða við, rekið eigin sveitir (Stórsveit Samúels Jóns Samúelssonar) og leikið með hljómsveitum eins og Jagúar, Havana og Milljónamæringunum. Hann hefur einnig gefið út sólóplötur og unnið með fjölmörgu tónlistarfólki og hljómsveitum, ýmist á sviði og á plötum sem skipta tugum ef ekki hundruðum.

Pétur Ben tónlistarmaður fagnar stórafmæli en hann er fimmtugur á þessum degi, hann hefur gefið út sólóplötur auk þess að vinna með listamönnum eins og Eberg, Elínu Ey, Mugison, Lay Low og Ólöfu Arnalds. Pétur hefur ennfremur leikið með hljómsveitum eins og Tristian og Inflammatory.

Höskuldur Ólafsson hagfræðingur og Quarashi meðlimur er fjörutíu og níu ára gamall á þessum degi, hann var einnig hér áður fyrr í hljómsveitum eins og Wool, Ske og 2001 svo nokkur dæmi séu nefnd.

Greta Salóme Stefánsdóttir söngkona, fiðluleikari og tónskáld er fertug og á því stórafmæli í dag. Eins og alþjóð veit hefur hún tvívegis farið sem fulltrúi Íslands í Eurovision keppnina, með lögin Never forget (2012) og Hear them calling (2016) og hún á einnig að baki eina sólóplötu, In the silence sem kom út 2012. Greta Salóme hefur aukinheldur  leikið inn á fjölmargar plötur annarra listamanna.

Ásgeir Sigurðsson

Trommuleikarinn Ragnar Sigurjónsson (oft nefndur Gösli hér áður) er sjötíu og átta ára gamall í dag. Ragnar lék með miklum fjölda hljómsveita hér áður og meðal þeirra má nefna misþekktar sveitir eins og Dúmbó og Steina, Brimkló, Mána, Spottana, Stuðmenn, Randver, Sviðna jörð, Dansbandið og Mexíkó. Hann hefur auk þess leikið inn á ógrynni platna sem session maður.

Þá á Edda Þórarinsdóttir leik- og söngkona áttatíu og eins árs afmæli í dag. Edda hefur sungið víða á leiksviðinu og inn á fjölda platna í því samhengi en hennar langstærsta hlutverk á söngsviðinu er auðvitað með Þremur á palli sem naut fádæma vinsælda á meðan það starfaði en þau voru að allan áttunda áratug liðinnar aldar. Hún hefur reyndar lítillega einnig starfað með tríóinu Tveimur á palli með einum kalli sem er eins konar útfærsla af fyrrnefnda tríóinu.

Gunnar Ringsted gítarleikari og tónlistarkennari á sjötíu og fjögurra ára afmæli í dag. Hann hefur starfað með ógrynni sveita á Akureyri, í Borgarfirðinum og víðar og við lauslega athugun fundust á þriðja tug sveita sem hann hefur leikið með, þeirra á meðal má nefna Seðla, Key to the highway, Nafið, Óvissu, Flakkara, Gammel dansk, Roof tops, Bítilbræður, Hunang, Miðhraunstríóið, Spacemen og Blindhæð.

Gerður Jóna Benediktsdóttir söngkona (fædd 1945) hefði einnig átt afmæli á þessum degi en hún lést árið 2021. Það má með sanni kalla hana barnastjörnu en hún átti að baki stórsmellinn Æ, ó, aumingja ég, sem hún söng fjórtán ára gömul árið 1959 inn á tveggja laga plötu. Það lag fylgdi henni síðan og heyrist enn reglulega spila á útvarpsstöðvum og víðar.

Og að síðustu er hér nefndur Ásgeir Sigurðsson tónlistarfrömuður og hárskeri á Selfossi (1933-2025). Ásgeir stofnaði m.a. og stjórnaði lúðrasveitum á Selfossi og kenndi við tónlistarskólann þar einnig – hann var síðar skólastjóri skólans um árabil. Hann lék jafnframt á klarinettu í Hljómsveit Óskars Guðmundssonar á Selfossi en hafði áður leikið með hljómsveitum Sverris Garðarssonar og Rúts Hannessonar á höfuðborgarsvæðin, þá hafði hann einnig leikið með Lúðrasveit Hafnarfjarðar.