Arnar Freyr Frostason

Þrjú tónlistartengd afmælisbörn eru á lista Glatkistunnar á þessum hlaupársdegi:

Arnar Freyr Frostason rappari (Úlfur úlfur) er þrjátíu og sex ára gamall á þessu sjaldséða degi dagatalsins. Hann hefur verið töluvert áberandi í rappsenunni síðastliðin ár og þekktastur fyrir framlag sitt með rappsveitinni Úlfi úlfi en hann var einnig meðal meðlima hljómsveitarinnar Bróður Svartúlfs sem sigraði Músíktilraunir 2009. Báðar sveitirnar hafa sent frá sér plötur auk þess sem rödd Arnars hefur heyrst á plötum fjölda annarra tónlistarmanna.

Tónlistarmaðurinn Magnús Leifur Sveinsson úr Hafnarfirði er fjörutíu og fjögurra ára gamall í dag. Hann hefur starfað með ótal hljómsveitum og hér má nefna sveitir eins og Siferlæs, Þrumuketti, Thundercats, Úlpu, Það sem úti frýs og síðast en ekki síst Stæner sem sigraði Músíktilraunir á sínum tíma. Magnús Leifur hefur jafnframt leikið inn á fjölda útgefinna platna.

Þá hefði Guðmundur H. Norðdal tónlistarmaður og -kennari einnig átt afmæli á þessum degi en hann lést 2018. Guðmundur (f. 1928) starfaði við tónlist frá ýmsum hliðum, t.d. sem hljóðfæraleikari, hljómsveitastjóri, stjórnandi lúðrasveita og kóra, tónlistarkennari og höfundur kennsluefnis í tónlist fyrir börn. Þá lék hann með fjölda hljómsveita hér fyrrum.

Vissir þú að Mike Pollock og Herbert Guðmundsson voru saman í hljómsveit á unglingsárunum?