Afmælisbörn 17. júní 2017

Svavar Gests

Tvö afmælisbörn eru á skrá Glatkistunnar á þessum annars ágæta þjóðhátíðardegi Íslendinga:

Magnús Stefánsson trommuleikari frá Raufarhöfn er fimmtíu og átta ára gamall á þessum degi. Magnús lék á sínum tíma með mörgum misþekktum hljómsveitum og voru Utangarðsmenn, Egó, Sálin hans Jóns míns, Maó, Skuggar, Tíbet tabú, Jenný og Bodies meðal þeirra. Magnús hefur í seinni tíð verið einn þeirra sem standa að Marita fræðslu fyrir unglinga.

Svavar Gests (1926-96) hefði einnig átt afmæli í dag en hann kom með ýmsum hætti að íslensku tónlistarlífi. Svavar ásamt Kristjáni Kristjánssyni (KK) komu með djasstónlistina beint í æð til Íslands frá Bandaríkjunum 1947 þegar þeir komu heim úr tónlistarnámi. Svavar hafði menntað sig í trommuleik og slagverki og starfrækti lengst af eigin sveit en lék einnig með öðrum hljómsveitum. Hann setti á fót hljómplötuútgáfur, SG-hljómplötur lifði lengst þeirra, en einnig gaf hann út tímarit, skrifaði um tónlist, annaðist dagskrárgerð hjá Ríkisútvarpinu, flutti inn erlenda tónlistarmenn og var framarlega í félagsmálum tónlistarmanna með ýmsum hætti.