Afmælisbörn 23. júlí 2017

Carl Billich

Tvö afmælisbörn tengd íslenskri tónlistarsögu eru á skrá Glatkistunnar í dag:

Jóhann (Jón) Þórisson er sextíu og eins árs gamall á þessum degi. Jóhann lék á bassa í nokkrum hljómsveitum á áttunda áratug liðinnar aldar og má nefna sveitir eins og Dögg, Fjörefni, Helþró, Dínamít og Paradís en hann mun hafa haft stuttan stans í þeirri síðast töldu. Jóhann er bróðir Rúnars Þórissonar.

Carl Billich (1911-89) átti einnig afmæli á þessum degi. Hann var austurrískur píanóleikari sem kom hingað til lands árið 1933, hann var tekinn höndum af Bretum við hernámið en látinn laus eftir stríð, fékk íslenskan ríkisborgararétt og bjó hér til æviloka. Carl starfrækti hljómsveitir í eigin nafni og lék með mörgum sveitum, stjórnaði kórum og vann að eflingu íslensks tónlistarlíf. Hann hlaut fyrir það hina íslensku fálkaorðu.