Afmælisbörn 27. júlí 2017

Baldur Þórir Guðmundsson

Afmælisbörn dagsins í tónlistargeiranum eru tvö að þessu sinni:

Keflvíkingurinn Baldur Þórir Guðmundsson er fimmtíu og þriggja ára gamall. Baldur (sonur Rúnars Júl. og Maríu Baldursdóttur) lék á hljómborð og ýmis önnur hljóðfæri með hljómsveitum á unglingsárum sínum s.s. Box, Kjarnorkublúsurunum, CTV og Pandóru en sneri sér síðar í auknum mæli að upptökufræðum enda var fjölskyldufyrirtækið Geimsteinn aldrei langt undan. Hann leikur þó reglulega inn á plötur samhliða upptökustörfum.

Læknirinn Haukur Heiðar Hauksson (sonur Hauks Heiðars píanóleikara) er þrjátíu og fimm ára gamall í dag. Haukur er söngvari hljómsveitarinnar Diktu og leikur aukinheldur á píanó og gítar í sveitinni en hann hefur einnig sungið í hljómsveitum eins og Plug og Jesúítunum, og á plötu Helga Júlíusar. Haukur söng ennfremur lag í undankeppni Eurovision 2015 eins og margir e.t.v. muna.