Afmælisbörn 28. júlí 2017

Ágústa Eva Erlendsdóttir

Í dag eru á skrá Glatkistunnar fjögur tónlistartengd afmælisbörn:

Söngkonan Birgitta Haukdal frá Húsavík er þrjátíu og átta ára gömul á þessum degi. Birgitta hafði sungið í söngsýningum á Hótel Íslandi þegar hún gerðist söngkona Írafárs haustið 1999 og sló þar heldur betur í gegn. Hún varð síðar fulltrúi Íslands í úrslitum Eurovision keppninnar 2002, hefur komið að margs konar tónlistarverkefnum og hefur auk þess gefið út þrjár sólóplötur. Minna hefur farið fyrir Birgittu allra síðustu árin.

Önnur söngkona (og leikkona), Ágústa Eva Erlendsdóttir á afmæli en hún er þrjátíu og fimm ára í dag. Þekktasta hlutverk Ágústu Evu er sjálfsagt Silvía Nótt / Silvia Night sem var framlag Íslands í Eurovision 2006 en hún hefur einnig starfað nokkuð í leikhúsi og með fjöldanum öllum af tónlistarfólki s.s. Megasi. Ágústa Eva var í hljómsveitum eins og Etanól sem hafnaði í þriðja sæti Músíktilrauna 1999, Ske og Kritikal Mazz en er um þessar mundir í dúettnum Sycamore tree.

Ólafur Bachmann Haraldsson trommuleikari er sjötugur í dag og hann á stórafmæli dagsins. Óli Bach lék með fjölmörgum hljómsveitum, einkum sunnlenskum, hér fyrrum og má þar nefna Limbó, Hauka, Hljómsveit Hjördísar Geirs, Mána, Hljómsveit Stefáns P, Hljómsveit Gissurar Geirs og Loga en hann söng einmitt þekktasta lag síðast töldu sveitarinnar, Minning um mann. Ólafur hefur ennfremur leikið inn á tugi hljómplatna.

Tónskáldið Gunnar Reynir Sveinsson hefði einnig átt afmæli á þessum degi en hann lést árið 2008. Gunnar Reynir sem einnig var víbrafónleikari, var fæddur 1933 og lék með ýmsum danshljómsveitum á árum áður, hann sneri sér síðan í auknum mæli að tónsmíðum og tónlistarkennslu, og hefur oft verið kallaður upphafsmaður kammerdjasssins á Íslandi. Gunnar Reynir nam tónsmíðar hér heima og í Hollandi en út hafa komið nokkrar plötur þar sem tónlistarmenn hafa leikið lög hans.