Afmælisbörn 23. ágúst 2020

Kristín Birgitta Ágústsdóttir

Afmælisbörnin eru fjögur talsins á skrá Glatkistunnar að þessu sinni:

Jón Elfar Hafsteinsson gítarleikari og kokkur er fimmtíu og þriggja ára gamall í dag. Margir muna eftir honum síðhærðum með Stjórninni þegar Eitt lag enn tröllreið öllu hér á landi en Jón Elfar hefur einnig leikið með sveitum eins og Sigtryggi dyraverði, Singultus, Hjartagosunum, Dykk, Delizie Italiane, Dægurlagacombói Jóns Ólafssonar og Sikk svo dæmi séu tekin, auk þess að starfa sem upptökumaður.

Brynja Guðmundsdóttir túbuleikari á einnig afmæli í dag en hún er þrjátíu og átta ára gömul. Brynja er ein Wonderbrass stúlkna sem léku og sungu með Björku á tónleikaferðum en hún hefur einnig leikið á fjölmörgum plötum. Brynja leikur á ýmis önnur hljóðfæri, einkum blásturshljóðfæri, og hefur nokkuð fengist við tónlistarkennslu.

Þá á Laufey Soffía Þórsdóttir söngkona og bassaleikari frá Selfossi tuttugu og sex ára afmæli á þessum degi. Laufey Soffía hefur starfað sem sólólistamaður en einnig með hljómsveitum eins og Kælunni miklu (sem sigraði Ljóðaslamm Borgarbókasafnsins 2013), Madonna + Child, Ryba og World narcosis.

Og að síðustu er hér nefnd Kristín Birgitta Ágústsdóttir sem yfirleitt gengur undir nafninu Stina August en hún er fjörutíu og fjögurra ára gömul í dag. Kristín hefur starfað með nokkrum hljómsveitum og tónlistarfólki undir nöfnunum AXXE, Björkologi, Nista og 23/8  en einnig gefið út nokkrar sólóplötur, m.a. plötu með lögum Jóhanns G. Jóhannssonar. Hún hefur mestmegnis starfað erlendis.