Afmælisbörn 19. apríl 2017

Unnur María Bergsveinsdóttir

Í dag eru tónlistartengd afmælisbörn Glatkistunnar tvö:

Steinunn Birna Ragnarsdóttir píanóleikari er fimmtíu og níu ára gömul, hún lauk einleikaraprófi á píanó frá Tónlistarskólanum í Reykjavík og framhaldsnámi í Bandaríkjunum. Hún var ráðin tónlistarstjóri Hörpunnar þegar hún opnaði og gegndi því starfi þar til fyrir um ári síðan þegar hún tók við starfi óperustjóra Íslensku óperunnar. Steinunn Birna hefur gefið út plötur ein og í samstarfi við aðra hljóðfæraleikara, leikið á ýmsum tónleikum hér heima og erlendis, starfað fyrir Ríkisútvarpið og Morgunblaðið, og haldið utan um tónlistarhátíðina Reykholtshátíð, svo dæmi séu tekin.

Unnur María Bergsveinsdóttir sagnfræðingur og bassaleikari Brúðarbandsins á einnig afmæli en hún er þrjátíu og níu ára gömul í dag. Hljómsveit hennar, Brúðarbandið, gaf út plötuna Meira! árið 2004 en síðan hefur lítið spurst til Unnar Maríu á tónlistarsviðinu en þeim mun meira á sirkussviðinu.