Afmælisbörn 10. júní 2017

Hugi Guðmundsson

Fjögur afmælisbörn koma við sögu hjá Glatkistunni á þessum degi:

Hugi Guðmundsson tónskáld er fertugur og á stórafmæli dagsins, hann nam tónsmíðar hér heima, auk mastersgráða í Danmörku og Hollandi og hefur unnið til ýmissa verðlauna og viðurkenninga fyrir verk sín, m.a. á Íslensku tónlistarverðlaununum í flokki sígildrar og samtímatónlistar. Hugi hefur starfað með ýmsum hljómsveitum á ferli sínum s.s. Njúton.

Ragna Kjartansdóttir (Cell7) tónlistar- og hljóðvinnslukona er þrjátíu og sjö ára. Hún vakti fyrst athygli fyrir framlag sitt í Subterranean og Tha Faculty hópnum sem rappari um og í kringum aldamótin en lét lítið fyrir sér fara meðan hún menntaði sig í hljóðupptökufræðum í New York. Hún birtist þó aftur með sólóplötu fyrir ári síðan og hefur starfað við tæknistörf hjá Ríkisútvarpinu. Hún hefur einnig rappað sem gestur á plötum annarra rappara eins og þeirra er siður.

Einar Sturluson tenórsöngvari (1917-2003) átti afmæli á þessum degi líka. Hann lærði söng hér heima, í Svíþjóð og Þýskalandi, starfaði mest eftir það í Noregi en varð að hætta að syngja þegar hann greindist með slæman astma. Þá kom hann heim til Íslands og sinnti eftir það mestmegnis söngkennslu. Eftir miðjan aldur var Einar laus við astmann og hóf þá að syngja á nýjan leik og gerði það allt til andláts. Safnplata með söng hans kom út 2002.

Sigurveig L. Hjaltested söngkona hafði ennfremur þennan afmælisdag. Hún var ein af fyrstu óperusöngkonum íslenskrar tónlistarsögu, söng í ótal óperuuppfærslum, í kórum og á einsöngstónleikum auk þess að kenna söng, sjálf hafði hún lært m.a. hjá Þorsteini Hannessyni. Sigurveig hlaut margar viðurkenningar fyrir framlag sitt til sönglistarinnar, t.d. fálkaorðuna. Söng hennar má heyra á fjölmörgum plötum, meðal annarra með Sigurði Ólafssyni en þau störfuðu nokkuð saman.