Afmælisbörn 22. ágúst 2017

Eiður Örn Eiðsson

Þrjú tónlistartengd afmælisbörn eru á skrá Glatkistunnar í dag:

Stórsöngvarinn frá Bíldudal, Jón Kr. (Kristján) Ólafsson er sjötíu og sjö ára. Jón vakti fyrst landsathygli með bílddælsku hljómsveitinni Facon en áður hafði hann reyndar sungið með Kvartettnum og Kristjáni, og Hljómsveit Jóns Ástvaldar Hall. Eftir að sögu Facons lauk starfaði Jón um tíma í Reykjavík, og söng þá með Hljómsveit Jóns Sigurðssonar en flutti því næst aftur vestur og hefur búið þar síðan. Þar setti hann á fót tónlistarsafnið Melódíur minninganna en einnig kom út ævisaga Jóns Kr. með sama nafni. Þrjár plötur hafa komið út með söng Jóns Kr. auk þess sem söng hans er að finna á nokkrum öðrum safnplötum.

Einnig á Birgir Ísleifur Gunnarsson tónlistarmaður afmæli í dag en hann er þrjátíu og sjö ára. Hann hefur starfrækt og starfað í hljómsveitum eins og Motion boys sem vakti athygli fyrir nokkrum árum en einnig má nefna (Blús)Byltuna, Stóns og nú síðast Tungl.

Þá á rokksöngvarinn Eiður Örn Eiðsson sextíu og fimm ára afmæli á þessum degi. Eiður söng hér á árum áður, einkum á áttunda og níunda áratugnum, með fjölda þekktra og óþekktra hljómsveita sem sumar hverjar gáfu út plötur, þeirra á meðal má hér nefna sveitir eins og Þrumuvagninn / Tívolí, C.o.T., Eik, Maestro, Rosie, Tatara, X-izt, Pops og Áhrif.