Afmælisbörn 7. júlí 2019

Vignir Snær Vigfússon

Fjórir tónlistarmenn eiga afmæli í dag og eru á skrá Glatkistunnar:

Aðalbjörn Tryggvason söngvari og gítarleikari Sólstafa er fjörutíu og tveggja ára gamall í dag, Sólstafir hefur starfað síðan 1995 og liggja vel á annan tug útgáfa eftir sveitina. Sólstafir er þó ekki eina sveitin sem Aðalbjörn starfar með því hann hefur einnig leikið með Melrökkum sem einkum hafa sérhæft sig í tónlist Metallica.

Annar gítarleikari og söngvari á afmæli í dag, Vignir Snær Vigfússon jafnan kenndur við Írafár, er fertugur og á því stórafmæli. Vignir sem kemur upphaflega frá Kirkjubæjarklaustri, hefur leikið með ýmsum hljómsveitum s.s. Fljótinu sem rann, Dægurlagakombóinu, Rokk og Vinum Sjonna sem kepptu fyrir hönd Íslendinga í Eurovision 2011, Vignir hefur reyndar oftar farið sem einn af fulltrúum Íslands í keppnina. Vignir hefur ennfremur starfað við upptökur og útsetningar auk þess að hafa samið fjöldann allan af þekktum lögum.

(Örvarr) Atli Örvarsson hljómborðsleikari og kvikmyndatónskáld frá Akureyri á fjörutíu og níu ára afmæli í dag. Atli var áberandi um og upp úr 1990 er hann lék með sveitum eins og Sálinni hans Jóns míns og SSSól en áður hafði hann slegið í gegn með Stuðkompaníinu. Atli flutti síðan vestur um haf og hefur á síðustu árum haslað sér völl sem kvikmyndatónskáld og samið tónlist fyrir fjölda kvikmynda og sjónvarpssería.

Börkur Hrafn Birgisson gítarleikari og upptökumaður á ennfremur afmæli í dag en hann á fjörutíu og fjögurra ára gamall. Hann hefur leikið með hljómsveitum eins og Baggabandinu, Jagúar og Mono town en hefur á síðari árum snúið sér í auknum mæli að upptökustjórnun og annarri hljóðversvinnu.