Afmælisbörn 5. janúar 2021

Ægir Sindri Bjarnason

Í dag eru fjögur tónlistartengd afmælisbörn á skrá Glatkistunnar:

Davíð Þór Jónsson er fimmtíu og sex ára gamall í dag, hann er fremur þekktur sem skemmtikraftur, fjölmiðlamaður, guðfræðingur og nú prestur, annar Radíus bræðra og sitthvað fleira en að vera tónlistarmaður. Hann var þó söngvari hljómsveitarinnar Faríseanna sem gaf út plötu 1996, samdi þar bæði lög og texta, en hefur aukinheldur samið fjölmarga söngtexta fyrir leikhús og aðra tónlistarmenn.

Þá á einnig Ægir Sindri Bjarnason trommuleikari afmæli en hann er tuttugu og átta ára gamall á þessum degi. Hann hefur lamið trommusett með fjölda hljómsveita og meðal þeirra eru hér nefndar Dead herring, R6013, World narcosis, Logn, Klikk og Electric playground.

Gyða Valtýsdóttir sellóleikari, tónskáld og margt annað er þriðja afmælisbarn dagsins er hún er þrjátíu og níu ára gömul í dag. Gyða sem vann nýlega til tónlistarverðlauna Norðurlandaráðs vakti fyrst athygli með hljómsveitinni múm og hefur einnig starfað með kammerhópnum Krumma, en hún hefur jafnframt leikið á plötum fjölda annarra tónlistarmanna og hljómsveita s.s. Megasi, Slowblow, Úlfi Hanssyni og Kimono. Gyða hefur aukinheldur sent frá sér sólóplötur og starfað við kvikmyndatónlist.

Kristín Anna Valtýsdóttir píanóleikari, söngkona og tónskáld, tvíburasystir Gyðu á auðvitað einnig þennan afmælisdag og er því líka þrjátíu og níu ára. Hún starfaði einnig með hljómsveitinni múm og hefur starfað undir nafninu Kría Brekkan og gefið út nokkrar plötur undir því aukasjálfi, þá hefur hún starfað með Stórsveit Nix Noltes og komið við sögu á plötum Slowblow, Skúla Sverrissonar og fjölda annarra listamanna auk þess að hafa gefið út sólóefni.

Vissir þú að faðir Jakobs Magnússonar, Magnús Guðmundsson söng með syni sínum í laginu Röndótta mær?