Afmælisbörn 18. janúar 2021

Ásta Kristín Pjetursdóttir

Fjögur tónlistartengd afmælisbörn koma við sögu Glatkistunnar í dag:

Friðrik Vignir Stefánsson orgelleikari af Skaganum er fimmtíu og níu ára á þessum degi. Hann nam orgelleik á Akranesi og Reykjavík, fór til Danmerkur í framhaldsnám og hefur starfað sem organisti, stjórnandi kóra og skólastjóri tónlistarskóla t.d. í Grundarfirði og Seltjarnarnesi. Hann var ennfremur í sönghópnum Sex í sveit.

Söngvarinn Páll Rósinkranz (Óskarsson) er fjörutíu og sjö ára gamall. Pál þekkja flestir, honum skaut fyrst á stjörnuhimininn með hljómsveitinni Jet Black Joe, hafði þá reyndar verið í nokkrum hljómsveitum eins og Nirvana, en hefur aðallega fengist við gospel- og sólósöng í seinni tíð. Páll Rósinkranz hefur gefið út fjölmargar sólóplötur, þær eru mestmegnis með eldra efni eftir aðra, og sungið á plötum annarra.

Kristinn Skagfjörð Sæmundsson er fimmtíu og fimm ára gamall í dag en hann er öllu þekktari undir nafninu Kiddi í Hljómalind eða Kiddi kanína. Kiddi hefur komið að íslenskri tónlist frá ýmsum hliðum, rekið plötubúðir um árabil, annaðist dreifingu og útgáfu á tónlist, útgáfu tónlistarblaðs og tónleikahald af ýmsu tagi en hefur nú dregið sig að mestu úr tónlistinni.

Ásta Kristín Pjetursdóttir er tuttugu og fimm ára gömul í dag en hún hefur vakið heilmikla athygli hin síðustu ár, fyrst sem lágfiðluleikari sem m.a. sigraði einleikarakeppni Tónlistarskólans í Reykjavík og svo þegar hún lenti í þriðja sæti Músíktilrauna 2019. Í kjölfarið sendi hún frá sér sólóplötuna Sykurbað.

Vissir þú að Eyþór Gunnarsson og KK eru mágar?