Afmælisbörn 16. júlí 2015

Ásgeir Óskarsson

Ásgeir Óskarsson

Þrjú afmælisbörn koma við sögu Glatkistunnar í dag:

Trommuleikarinn og Stuðmaðurinn Ásgeir Óskarsson er 62 ára. Hljómsveitalisti trymbilsins er líklega með þeim lengri í bransanum en Ásgeir hafði leikið með mörgum bítla- og hippasveitum áður en að Stuðmannaævintýrinu kom, þar má nefna Scream, Fjörefni, Terso, Arfa, Trix, Andrew, Menninguna, Apple, Paradís, Pelican og Eik. Í seinni tíð hefur hann leikið með hljómsveitum eins og Þursaflokknum, Tamlasveitinni, Icecross, Ástarkveðju, The Riot, Specials, Sunnan 3, Trap, Vinum Dóra, Þremur á palli, Auknum þrýstingi, Gullkistunni, Bandinu hans pabba, Grúsk, Fánum, Danshljómsveit Vilhjálms Guðjónssonar, Bítladrengjunum blíðu og Vönum mönnum. Þá er ótalinn sólóferill Ásgeirs sem telur fjórar plötur.

Eðlisfræðingurinn Andri Guðmundsson hljómborðsleikari er þrjátíu og þriggja ára gamall í dag. Andri var hljómborðsleikari Írafárs en hann lék einnig um tíma með hljómsveitinni Landi og sonum. Hann hefur nú snúið sér að annars konar verkefnum og býr í Svíþjóð í dag.

Einnig hefði tónskáldið Þorkell Sigurbjörnsson átt afmæli í dag en hann lést árið 2013. Þorkell (f. 1938) nam sín fræði hér heima, í Bandaríkjunum og í Þýskalandi, kenndi á píanó, stjórnaði kórum og kenndi tónsmíðar enda samdi hann margar af perlum íslenskra sönglaga auk annarra verka, þekkast verka hans er án efa sálmurinn Heyr himnasmiður. Þorkell lét sig einnig félagsmál tónlistarmanna varða, var t.a.m. í stjórn Listahátíðar, Musica Nova og formaður Tónskáldafélags Íslands.