Afmælisbörn 5. september 2017

Kristján Kristjánsson

Afmælisbörn Glatkistunnar eru tvö í dag, bæði eru látin:

Sjálfur Kristján Kristjánsson (KK) saxófónleikari hefði átt þennan afmælisdag. Hann fæddist 1925, lærði á harmonikku, klarinettu og saxófón hér heima og í Bandaríkjunum, hann er kunnastur fyrir hljómsveit sína, KK sextettinn sem hann starfrækti um fimmtán ára skeið en sveitin var vinsælasta danssveit landsins og með þekktustu söngvarana, s.s. Ragnar Bjarnason og Ellyju Vilhjálms. Kristján lék með og starfrækti fleiri sveitir en þær voru skammlífari, hann lést 2008.

(Ólafur) Bessi Bjarnason leikari átti einnig afmæli á þessum degi en hann lést 2005. Bessi (fæddur 1930) söng og las inn á fjölmargar plötur ætlaðar börnum, margir muna t.d. eftir plötunni þar sem hann söng lög með vísum Stefáns Jónssonar og enn fleiri muna eftir honum í hlutverki Mikka refs í Dýrunum í Hálskógi. Einnig var hann sögumaður á nokkrum plötum sem innihéldu ævintýri fyrir börn.