Afmælisbörn 12. ágúst 2019

Helgi E. Kristjánsson

Glatkistan hefur fjögur tónlistartengd afmælisbörn á skrá sinni í dag:

Fyrsta skal nefna Halldóru Geirharðsdóttur (Dóru Wonder) leik- og tónlistarkonu en eins og margir muna var hún söngkona og saxófónleikari hljómsveitarinnar Risaeðlunnar eða Reptile eins og hún kallaðist á erlendri grundu. Sú sveit gaf út nokkrar plötur en söng hennar má einnig heyra á plötum sem gefnar hafa verið út í tengslum við leikhús. Halldóra fimmtíu og eins árs gömul í dag.

Önnur tónlistarkona, Oddný Sturludóttir hljómborðsleikari og píanókennari er fjörutíu og þriggja ára á þessum degi. Oddný lék meðal annars með hljómsveitinni Ensími á upphafsárum þeirrar sveitar og starfrækti einnig ung að árum Tríó Oddnýjar en hefur hin síðustu ár sinnt tónlistarkennslu, blaðaskrifum og embættisstörfum á vegum Reykjavíkurborgar svo dæmi séu tekin.

Helgi E. Kristjánsson tónlistarmaður hefði einnig átt afmæli á þessum degi en hann lést árið 2016. Helgi (f. 1946) lék á gítar, bassa og fjölmörg önnur hljóðfæri með ýmsum hljómsveitum hér fyrrum s.s. Sextett Ólafs Gauks, Kaktus, Musica nostra, Trad kompaníinu og mörgum fleirum, þá stjórnaði hann kórum, útsetti og annaðist hljóðupptökur og þess að kenna tónlist.

Að síðustu er hér nefndur harmonikkuleikarinn Jón Þorsteinsson en hann er þrjátíu og eins árs gamall í dag. Jón hefur lokið einleikaraprófí í klassískum harmonikkuleik og vann sér meðal annars það til frægðar að leika einleik með Sinfóníuhljómsveit Íslands aðeins níu ára gamall, þrettán ára sigraði hann einleikarakeppni MENOR en sú keppni er haldin meðal harmonikkuleikara.