Afmælisbörn 11. janúar 2021

Unnur Birna Björnsdóttir

Fjögur afmælisbörn eiga daginn í dag:

Sigurður Rúnar Samúelsson (Siggi Sam) bassaleikari og fasteignasali frá Ísafirði er fjörutíu og átta ára gamall í dag. Sigurður, sem er af bassaleikaraættum (sonur Samúels Einarssonar í BG & Ingibjörgu) hefur leikið með ýmsum hljómsveitum á ferlinum s.s. Írafári, Hljómsveit Al Deilis, Bravó, Dægurlagakombóinu og Boogie knights svo fáeinar séu hér upp taldar.

Gítarleikarinn Tryggvi (Júlíus) Hübner er sextíu og fjögurra ára í dag en hann hefur leikið með fjölda sveita í gegnum tíðina, Þjófar, Eik, Þorgils, Aldrei aftur, Bítlarnir, Faraldur, Haukar, Mátturinn og dýrðin, Fjörefni, Cabaret, Blues akademían, Friðryk, Garg, Bárujárn og Áhöfnin á Halastjörnunni eru einungis brot af þeim. Tryggvi hefur einnig gefið út sólóplötur og leikið inn á ógrynni platna með öðrum listamönnum.

Unnur Birna Björnsdóttir söngkona, fiðluleikari, tónlistarkennari, útsetjari, tónskáld, kórstjóri og margt annað er þrjátíu og fjögurra ára gömul í dag. Unnur Birna, sem vakti fyrst athygli sem orgelleikari í sigurframlagi Söngkeppni framhaldsskólanna 2007, á reyndar á ekki langt að sækja tónlistarhæfileikana og hefur leikið með fjölda hljómsveita s.s. Blágresi, 13 tunglum, Ummhmm og mörgum öðrum en hefur jafnframt leikið og sungið á fjölda platna á síðustu árum auk sólóplötu.

Berti Möller (Bertram Henry Möller) söngvari og lögreglumaður (1943-2007) átti einnig afmæli á þessum degi, hann söng með hljómsveitum frá sjötta og fram á áttunda áratug síðustu aldar með sveitum eins og Diskó sextett, Hljómsveit Svavars Gests, Eron, Falcon, Hljómsveit Elfars Berg, KK sextett, Lúdó og Stefán, Sextett Berta Möller og Úranus sextett. Berti lék einnig á bassa í einhverjum ofangreindra sveita.

Vissir þú að Felix Bergsson sem lengi var kenndur við Greifana var aðeins eitt og hálft ár í sveitinni?