Afmælisbörn 14. mars 2021

Friðjón Jóhannsson

Í dag eru þrjú tónlistartengd afmælisbörn á lista Glatkistunnar:

Bernharður St. Wilkinson (Bernard Wilkinson) stjórnandi og flautuleikari er sjötugur í dag og á því stórafmæli. Hann er Breti sem kom hingað til lands 1975 til að leika með Sinfóníuhljómsveit Íslands og hefur starfað hér meira og minna síðan, leikið inn á fjöldann allan af plötum og stjórnað hljómsveitum og kórum eins og Sinfóníuhljómsveit Íslands, Blásarakvintett Reykjavíkur, Lúðrasveit æskunnar og Söngsveitinni Fílharmóníu svo dæmi séu tekin. Hann hefur verið búsettur í Færeyjum undanfarið.

Svavar Austmann Traustason bassaleikari í rokksveitinni Sólstöfum er fjörutíu og tveggja ára gamall á þessum degi. Svavar hefur verið bassaleikari sveitarinnar frá því í kringum aldamót og tekið þátt í þeirri velgengni sem sveitin hefur skapað sér með plötum á borð við Köld, Svartir sandar og Ótta.

Friðjón Ingi Jóhannsson mjólkurfræðingur og tónlistarmaður er sextíu og fimm ára gamall í dag. Hann er líkast til kunnastur fyrir að starfrækja hljómsveit í eigin nafni, Danshljómsveit Friðjón Jóhannssonar sem hefur haft það aðal markmið að varðveita tónlist af Austurlandi en sveitin hefur sent frá sér nokkrar plötur. Friðjón hefur einnig leikið í gegnum tíðina með ýmsum hljómsveitum fyrir austan og norðan s.s. Thule 2,5%, Völundi, Slagbrandi, Mánatríóinu, Panic, Skruggu og mörgum fleirum.

Jón „bassi“ Sigurðsson átti einnig afmæli á þessum degi en hann lést 2007. Jón (f. 1932) lék með flestum betri hljómsveitum bæjarins hér á árum áður eins og KK sextett, Sumargleðinni, Sinfóníuhljómsveit Íslands (allt frá stofnun), Hljómsveit Jan Morávek, Hljómsveit Björns R. Einarssonar og Sextett Jón Sigurðssonar, svo nokkrar séu hér nefndar.

Vissir þú að Edda Þórarinsdóttir (Þrjú á palli) og Finnur Torfi Stefánsson (Óðmenn o.fl.) voru foreldrar Fróða Finnssonar (Sororicide o.fl.)?