Afmælisbörn 7. nóvember 2016

gudlaugur-falk

Guðlaugur Falk

Afmælisbörn dagsins eru þrjú talsins á skrá Glatkistunnar:

Guðlaugur (Auðunn) Falk gítarleikari er fimmtíu og sjö ára í dag. Guðlaugur hefur starfað með mörgum rokkhljómsveitum, sumum í þyngri kantinum, og má þar m.a. nefna Exizt, Fist, Gildruna, Dark harvest, Stálfélagið og C.o.T. Hann hefur einnig gefið út tvær sólóplötur.

Óttarr Ólafur Proppé alþingismaður og söngvari Ham, Funkstrasse, Rass, Dr. Spock, Drullu o.fl. er fjörutíu og átta ára í dag. Margir þekkja hann einnig sem prófessorinn á Diskóeyjunni og enn fleiri muna eftir honum í bakraddahlutverki í Eurovision keppninni með Pollapönkurunum.

Einnig hefði Guðmundur Finnbjörnsson (f. 1923) fiðlu- og saxófónleikari frá Ísafirði átt afmæli þennan dag en hann rak hljómsveitir undir eigin nafni um árabil auk þess að leika með ýmsum danshljómsveitum hér á árum áður. Guðmundur lést 2009.