Afmælisbörn 13. nóvember 2016

arnthor-orlygsson

Arnþór Örlygsson

Afmælisbörn dagsins eru þrjú að þessu sinni:

Ingibjörg Guðjónsdóttir sópran söngkona og kórstjórnandi er fimmtíu og eins árs í dag. Hún gaf út plötu með óperuaríum fyrir nokkrum árum og síðar einnig djassskotnu plötuna Ó ó Ingibjörg, ásamt bræðrum sínum, hún hefur aukinheldur sungið inn á nokkrar aðrar plötur. Ingibjörg hefur stjórnað Kvennakór Garðabæjar og kvennakórnum Seljum sem dæmi.

Arnþór Örlygsson (of kallaður Addi 800) upptökumaður er fjörutíu og sex ára, hann hefur stýrt upptökum, tekið upp og hljóðblandað margar af vinsælustu plötum landsins seinni ára, þar má til dæmis nefna Land og syni, Stuðmenn, Þúsund andlit og Bubba Morthens. Þess má geta að hann lék á gítar með hljómsveitinni Blautum dropum fyrir margt löngu.

Matthías Jochumsson ljóðskáld (1835-1920) átti ennfremur afmæli þennan dag, hann orti m.a. ljóðið við þjóðsöng okkar Íslendinga, Lofsöng (Ó, guð vors lands) og ljóðið Minni kvenna (Fósturlandsins freyja) svo dæmi séu tekin.