Birgir Baldursson heiðursfélagi Blúsfélags Reykjavíkur 2017

Birgir Baldursson heiðurfélagi Blúsfélags Reykjavíkur 2017

Trommuleikarinn Birgir Baldursson var kjörinn heiðursfélagi Blúsfélags Reykjavíkur við setningu Blúshátíðar í Reykjavík 2017 í gær. Blúshátíðin var sett á Skólavörðustígnum þar sem tónlistarmenn buðu upp á sannkallaða Blúsveislu þar sem tónlistin ómaði. Boðið var upp á grillmat og félagar í Krúserklúbbnum viðruðu bíla sína og höfðu þá til sýnis.

Birgir Baldursson, sem nú ber nafnbótina blúsmaður ársins, var heltekinn af trommuleik strax fjögurra ára gamall og og hefur slegið taktinn síðan. Fyrst urðu húsgögnin á heimili hans fyrir barðinu á honum, einnig lampar og ljós, en fljótlega fékk hann trommusett og fór að spila með skólahljómsveit Kópavogs 10 ára gamall. Hann hefur spilað með hjómsveitum á borð við S.H. draumi, Bless, Sálinni hans Jóns míns, Mannakornum, Kombóinu, Blúsmönnum Andreu, Unun, Dr. Gunna, Blue Ice Band og mörgum fleirum. Hann hefur ennfremur leikið inn á tugi hljómplatna, unnið við kvikmyndatónlist, í leikhúsum og við söngleiki, svo eitthvað sé nefnt. Birgir hefur verið einn af merkisberum blústónlistarinnar hérlendis undanfarin ár og er vel að titlinum kominn.

Sem fyrr segir var Blúshátíð í Reykjavík 2017 sett í gær. Að vanda verða þrennir stórtónleikar á Hilton Reykjavík Nordica í dymbilvikunni, þriðjudags-, miðvikudags- og fimmtudagskvöld, og verður einnig dúndrandi stemming á klúbbi Blúshátíðarinnar á hótelinu eftir alla tónleikana. Blúsmiðinn er seldur á midi.is og við innganginn á Hilton Reykjavík Nordica en hann veitir aðgang að öllum þremur stórtónleikunum. Athugið að takmarkað magn miða er í boði – fyrstir kaupa, fyrstir fá.