Afmælisbörn 16. september 2017

Ómar Ragnarsson

Tvö afmælisbörn koma við sögu Glatkistunnar að þessu sinni:

Sjálfur orkuboltinn Ómar Ragnarsson er sjötíu og sjö ára í dag. Fáir hafa komið jafn víða við í lífinu og Ómar en hann hefur fengist við fréttamennsku, þáttagerð, rallakstur, flugmennsku, skemmtanahald og tónlist auk þess að vera einn þekktasti náttúruverndarsinni okkar Íslendinga. Ómar hefur sungið á tugum hljómplatna, samið texta og tónlist, auk söngskemmtana í gegnum tíðina.

Jón Ólafsson frá Kirkjulæk í Fljótshlíð hefði einnig átt afmæli í dag en hann lést 2008, aðeins fimmtíu og þriggja ára. Jón (fæddur 1955) var í hljómsveitinni Hjónabandinu ásamt eiginkonu sinni og fleirum en tvær plötur komu út með sveitinni, þar af önnur sem gefin var út í minningu Jóns. Hann var einnig einn af Öðlingunum, litlum sönghópi sem starfar innan Karlakórs Rangæinga.