Afmælisbörn 13. janúar 2018

Þórhallur Árnason

Sex afmælisbörn koma við sögu Glatkistunnar að þessu sinni:

Óskar Páll Sveinsson hljóð- og upptökumaður er fimmtíu og eins árs í dag. Hann var á yngri árum söngvari og hljómborðsleikari hljómsveitarinnar Medium en sneri sér síðan að upptökufræðum, starfaði sem tæknimaður hjá Ríkisútvarpinu og við upptökur og hljóðblöndun á fjölmörgum plötum hér heima áður en hann fluttist til Bretlands og vann þar við upptökur um tíma áður en hann kom aftur til Íslands. Í seinni tíð hefur Óskar Páll í auknum mæli snúið sér að tónsmíðum og samdi hann t.a.m. Eurovision framlag okkar Íslendinga árið 2009, Is it true? sem Jóhanna Guðrún söng.

Björgvin Ingi Pétursson bassaleikari Jakobínurínu sem starfaði á árunum 2004-09 og sigraði Músíktilraunir 2005, er tuttugu og níu ára gamall í dag. Hann hefur ekki fengist við tónlist síðustu árin.

Þorvaldur Jónsson harmonikkuleikari er áttatíu og átta ára. Sagan segir að hann hafi verið einungis ellefu ára gamall þegar hann lék á balli í fyrsta skipti en hann lék á fjölda slíkra balla sem ungur maður, ýmist einn eða með öðrum. Þá starfaði Þorvaldur með gömlu dansa hljómsveitum eins og Þristum og Tríó Þorvaldar, og reyndar lék hann opinberlega langt fram eftir níræðisaldrinum. Þorvaldur hefur ennfremur sent frá sér nokkrar plötur.

Sigvaldi (Stefánsson) Kaldalóns læknir og tónskáld (1881-1946) átti afmæli á þessum dagi. Hann samdi fjöldann allan af þekktum sönglögum sem finna má víða á plötum og heyrast mjög reglulega. Þeirra á meðal má nefna lög eins og Á Sprengisandi, Svanasöngur á heiði, Hamraborgin og mörg önnur.

Pétur Ingi Þorgeirsson hefði einnig átt afmæli þennan dag en hann lést aðeins tvítugur að aldri árið 1993. Pétur, sem fæddist 1973 var efnilegur tónlistar- og myndlistamaður og hafði verið öflugur í tónlistarlífi Menntaskólans í Reykjavík. Hann hafði m.a. komið við sögu á árshátíðarplötum skólafélagsins og eftir andlát hans gaf hljómsveitin Neol Einsteiger út plötu til minningar um hann.

Þá hefði Þórhallur Árnason sellóleikari (1891-1976) einnig þennan afmælisdag. Þórhallur var einn af fyrstu Íslendingunum sem menntaði sig í tónlist erlendis, hann nam í Danmörku og Þýskalandi og kom heim eftir um tveggja áratuga útlegð. Þá starfaði hann við tónlistarkennslu, lék margsinnis í útvarpinu og hélt tónleika en hann lék m.a. með Útvarpshljómsveitinni og fyrstu útgáfu Sinfóníuhljómsveitar Íslands. Hann lét sig réttindamál tónlistarmanna varða og var framarlega í þeim efnum