Blúshátíð í Reykjavík 2018

Larry McCray

Hin árlega Blúshátíð í Reykjavík er framundan en hún fer fram 24. til 29. mars nk.

Á Blúshátíð í Reykjavík 2018 verða þrennir stórtónleikar á Hilton Reykjavík Nordica í dymbilviku, á þriðjudags- miðvikudags- og fimmtudagskvöld.

Hátíðin hefst laugardaginn 24. mars með Blúsdegi í miðborginni þar sem  Blúshátíðin leggur Skólavörðustíginn undir sig. Við setningu hátíðarinnar verður tilkynnt um val á heiðursfélaga Blúsfélags Reykjavíkur 2018. Boðið verður upp á lifandi blús víða á Skólavörðustígnum frá klukkan 14.00 til 16.00. Kveikt verður upp í grillunum og boðið upp á kjúklingavængi og fleira. Tónleikar verða síðan í Borgarbókasafninu í Grófinni klukkan 16. 

Sem fyrr segir verða þrennir stórtónleikar á Hilton Reykjavík Nordica og verða þeir sem hér segir:

Þriðjudagur 27. mars kl. 20:00: Laura Chavez og Ina Forsman – Beggi Smári og Nick Jameson – Blúsaðasta band Músíktilrauna
Blúshátíð í Reykjavík hefst með látum enda er engin lognmolla í kringum Lauru Chavez og Inu Forsman, þvert á móti. Ina Forsman kom eins og hressandi hvirfilbylur inn í blúsheiminn og hefur frá fyrsta degi vakið eftirtekt og aðdáun fyrir túlkun, kraft og rödd sem þykir bæði vera undur mjúk og ansi hrjúf. Laura Chavez er frábær gítarleikari, sögð vera einn mesti blúsgítarleikari samtímans og stendur fyllilega undir því, kraftmikil og ljóðræn í senn. Áhorfendur um allan heim hafa kolfallið fyrir spilagleði og líflegri sviðsframkomu þeirra.
Fyrir hlé ráða Beggi Smári og Nick Jameson ríkjum á stóra sviðinu ásamt Friðriki Júlíussyni á trommur og Pétri Sigurðssyni á bassa. Á matseðlinum er kraftmikill blús, fjör og vænn skammtur af bráðsmitandi stemningu. Allra fyrst á sviðið verður blúsaðasta band Músíktilrauna 2018. Þetta er spennandi!

Miðvikudagur 28. mars kl. 20:00 – Larry McCray og The Blue Ice band – Langi Seli og Skuggarnir – Lúðrasveitin Svanur
Gítarleikarinn, söngvarinn og lagahöfundurinn Larry McCray hefur verið leiðandi í bandarískum blús síðustu 25 árin. Larry hefur verðskuldað verið valinn besti blúsleikari Bandaríkjanna og það verður sannkölluð upplifun að sjá hann á Blúshátíð. Strákarnir í The Blue Ice band iða í skinninu eftir því að fá að spila með þessum snillingi.
Langi Seli og töffararnir í Skuggunum trylla gesti hátíðarinnar með nýju efni og eldri smellum fyrir hlé en fyrst mun brassið ráða ríkjum. Já, Lúðrasveitin Svanur hitar fólk upp með sannkölluðum New Orleans bræðingi. Þetta er uppskrift að fjöri!

Fimmtudagur (skírdagur) 29. mars kl. 20:00 – Íslenskur blús í hæsta gæðaflokki
Á skírdagskvöld verður boðið upp á íslenska blúsveislu sem getur ekki klikkað. Fyrir hlé leiðir Tryggvi Hübner gítarleikari hljómsveit þar sem Haraldur Þorsteinsson er á bassa, Ásgeir Óskarsson á trommur og Magnús Jóhann á hljómborð. Flestir þeirra voru í hljómsveitinni Eik og nokkur lög þessarar goðsagnakenndu hljómsveitar munu heyrast á hátíðinni.
Eftir hlé bætast fleiri stjörnur í hópinn; Björgvin Gíslason, Sigurður Sigurðsson, Davíð Þór Jónsson, Guðmundur Pétursson, Óskar Logi, Stefanía Svavarsdóttir, Halldór Bragason, Róbert Þórhallsson og fleiri og fleiri. Á sviðinu verður rjóminn af íslenskum blústónlistarmönnum sem bjóða upp á blús af bestu sort. Þetta verður ekki betra!

Klúbbur Blúshátíðar verður opinn á Hilton Reykjavík Nordica eftir alla tónleikana og þar gerast undur og stórmerki. Reynsluboltar, ungliðar og frægir leynigestir hræra saman þjóðlegum íslenskum blús, Mississippi blús, rokki og öðrum skemmtilegheitum fyrir lífsglaða nátthrafna.

Ítarlega dagskrá fyrir alla hátíðardagana er að finna á www.blues.is.

Blúsmiðinn veitir aðgang að öllum þremur stórtónleikunum á Hilton Reykjavík Nordica. Takmarkað magn er í boði – fyrstir kaupa, fyrstir fá. Hægt er að kaupa miða á https://midi.is/concerts/1/10385/Blushatid_2018

Hátíðin er styrkt af Reykjavíkurborg.

Auglýsingar