Afmælisbörn 7. ágúst 2018

Eggert Kristinsson

Í dag koma þrjú afmælisbörn við sögu Glatkistunnar:

Rannveig Jóhannsdóttir er sextíu og níu ára gömul en margir hinna eldri muna eftir henni frá fyrstu árum Sjónvarpsins en hún sá þá um Stundina okkar ásamt hrafninum Krumma. Reyndar kom einnig út lítil plata með þeim Rannveigu og Krumma. Rannveig var lítið áberandi eftir þetta sjónvarpsævintýri en birtist reyndar löngu síðar aftur í Ríkissjónvarpinu með morgunsjónvarp fyrir börn.

Skúli Gestsson bassaleikari Diktu á einnig afmæli í dag en hann er þrjátíu og sex ára gamall. Skúli, sem reyndar leikur bæði á bassa og hljómborð, hefur starfað með Diktu síðan sveitin var stofnuð 1997 og tók þátt í tvennum Músíktilraunum með sveitinni áður en fyrsta platan kom út. Síðan hafa komið út fimm plötur með sveitinni.

Þá á fyrsti trommuleikari Hljóma, Eggert (Valur) Kristinsson sjötíu og sex ára afmæli á þessum degi. Eggert sem er frá Keflavík lék með fjöldanum öllum af hljómsveitum þar í bæ, fyrst aðeins tólf ára með Hljómsveit Gagnfræðiskólans í Keflavík en síðan með sveitum eins og Saxon, Beatniks, Heiðursmönnum, Hljómsveit Guðmundar Ingólfssonar, Spútnik tríó, Capri tríó, Tíglum og Nátthröfnum svo nokkrar séu hér upp taldar.

Auglýsingar