Bjöllukór Bústaðakirkju (1988-2001)

Bjöllukór Bústaðakirkju

Bjöllukór starfaði við Bústaðakirkju um árabil undir stjórn Guðna Þ. Guðmundssonar organista kirkjunnar.

Bjöllukórinn var stofnaður haustið 1988 en meðlimir hans voru yfirleitt á aldrinum 10 til 14 ára. Hann var endurnýjaður í nokkur skipti sökum aldurs barnanna og gat verið nokkuð misjafn að stærð.

Flestir meðlimir bjöllukórsins höfðu verið að læra á hljóðfæri hjá Guðna og höfðu því annað hljóðfæri sem aðalhljóðfæri, stundum léku þau á sín aðalhjóðfæri á tónleikum og þá gekk hópurinn undir nafninu Æskulýðshljómsveit Bústaðakirkju. Mörg þeirra voru ennfremur í Barnakór Bústaðakirkju og oft var talað um Barna- og bjöllukór Bústaðakirkju í sama vettvangi, bjöllukórinn var þó alltaf sjálfstæð eining innan kirkjustarfsins.

Bjöllukór Bústaðakirkju hélt margsinnis tónleika, bæði sjálfstæða en einnig í stærra samhengi, þá ásamt stærri hljómsveitum og kórum. Þau léku einnig við óvenjuleg tækifæri s.s. eins og þegar þau komu fram á útgáfutónleikum hljómsveitarinnar Múm og léku þar lög sveitarinnar. Kórinn fór ennfremur um land allt til tónleikahalds og lék meira að segja í Tívolí í Kaupmannahöfn.

Guðni stjórnandi lést sumarið 2000 og starfaði Bjöllukór Bústaðakirkju ekki lengi eftir það, hann mun hafa hætt störfum um áramótin 2001-02 og stjórnaði Jóhanna V. Þórhallsdóttir honum síðustu mánuðina.

Ein kassetta, Bjöllukór Bústaðakirkju leikur og syngur, kom út með hópnum, það var árið 1992 en hún innihélt sextán lög úr ýmsum áttum, þar af nokkur jólalög. Leik bjöllukórsins má einnig heyra á plötunni Kirkjutónar: Tónlistarlíf í Bústaðakirkju, sem gefin var út 1997 og hafði að geyma þverskurð af tónlistarstarfinu í kirkjunni.

Efni á plötum