Afmælisbörn 21. mars 2020

Elfar Berg

Á þessum degi eru afmælisbörnin þrjú á skrá Glatkistunnar:

Bergsveinn Arilíusson söngvari er fjörutíu og sjö ára, hann var áberandi á árunum fyrir og um aldamótin og söng lengst af með hljómsveitinni Sóldögg en einnig með Pöpum. Áður hafði hann vakið athygli með Ðí Kommittments og Acid juice, og 1993 kom út platan Kærleikur sem hafði að geyma gömul lög sungin af ungum og efnilegum söngvurum, þar söng hann tvö lög. Þá á Bergsveinn eina sólólpötu að baki

Eyþór Rafn Gissurarson er fimmtíu og átta ára gamall á þessum degi en hann hefur komið víða við á sínum ferli. Hann á að baki eina sólóplötu, Tónbrá sem kom út 2016 en hefur einnig leikið á gítar með fjölmörgum hljómsveitum í gegnum tíðina s.s. Ironside, Grettistaki, Sirka, Baggabandinu og Hljómsveit Sveinbjörns Dýrmundssonar.

Elfar Berg Sigurðsson píanóleikari (1939-2011) átti einnig þennan afmælisdag, hann starfaði einna lengst með hljómsveitinni Lúdó og Stefáni / Lúdó sextett og lék á plötum þeirrar sveitar en starfrækti líka eigin hljómsveitir, Tríó Elfars Berg og Hljómsveit Elfars Berg.