Afmælisbörn 3. janúar 2021

Sölvi Blöndal

Afmælisbörnin eru fjögur á skrá Glatkistunnar í dag:

Sölvi (Haraldsson) Blöndal fyrrum Quarashi-liði á fjörutíu og sex ára afmæli í dag. Sölvi hafði verið í ýmsum sveitum áður en hann gerði það gott með Quarashi, s.s. Púff, SSSpan, Júpiters og Stjörnukisa svo dæmi séu tekin en hefur einnig starfrækt dúettinn Halleluwah, auk annarra verkefna. Hann hefur ennfremur fengist við útsetningar og upptökustjórn og er í dag einn eigenda Öldu music.

Vilhelm Anton Jónsson eða bara Villi naglbítur, á einnig afmæli en hann er fjörutíu og þriggja ára gamall í dag. Villi var lengi þekktastur sem söngvari hljómsveitarinnar 200.000 naglbíta en hann hefur einnig gefið út sólóefni. Hann hefur í seinni tíð fengist við dagskrárgerð í útvarpi og sjónvarpi, leikið í kvikmyndunum um Sveppa og Villa, og gefið út vísindabækur fyrir börn.

Þá á Bergsteinn Ómar Óskarsson sextíu og átta ára afmæli á þessum degi. Ómar starfaði með fjölda hljómsveita á áttunda áratugum og voru Icecross og Pelican þeirra þekktastar, hann samdi mörg þekkt lög s.s. Jenny darling og My glasses sem bæði nutu feikilegra vinsælda. Þá liggja nokkrar sólóplötur einnig eftir Ómar, sú síðasta kom út árið 2006.

Að síðustu er hér nefndur (Sigfús) Ágúst Böðvarsson sem hefði jafnframt átt afmæli í dag en hann lést árið 1997. Ágúst sem fæddist 1906 var fyrst og fremst dægurlagatextahöfundur og samdi t.a.m. textann við lagið Við bjóðum góða nótt sem bróðir hans, Bjarni Böðvarsson flutti iðulega með hljómsveit sinni á dansleikjum. Ágúst á að auki fjölda annarra texta s.s. Ljósbrá, Skautapolka o.fl.

Vissir þú að Landslagskeppnin var haldin í fimm skipti?