Afmælisbörn 20. janúar 2021

Margrét Rósa Dóru- Harrysdóttir

Þrjú afmælisbörn koma í dag við sögu á skrá Glatkistunnar yfir tónlistarfólk:

Ársæll Másson gítarleikari og menntaskólakennari er sextíu og sex ára gamall í dag en hann hefur leikið með ýmsum sveitum í gegnum tíðina. Þeirra á meðal má nefna Stórsveit Reykjavíkur, Bambinos, Misgengið og Föruneyti Gísla Helgasonar. Ársæll gegndi starfi djasstónlistargagnrýnanda á DV um tíma.

Þórhallur Sigurðsson (Laddi) tónlistarmaður og skemmtikraftur er sjötíu og fjögurra ára gamall í dag. Laddi er þekktastur fyrir grínið og hefur m.a. gefið út fjölmargar plötur einn og í félagi við aðra, en hefur einnig sungið alvarlegri tónlist. Hann var trymbill í hljómsveitum hér áður fyrr og spilaði hér heima sem erlendis með þeim. Fyrir fáeinum árum kom út bók um Ladda, Þróunarsaga mannsins sem kom okkur til að hlæja, skráð af Gísla Rúnari Jónssyni en áður hafði önnur bók komið út um hann.

Og að síðustu er hér nefnd Margrét Rósa Dóru- Harrysdóttir bassaleikari hljómsveitarinnar Kælunnar miklu sem hefur vakið mikla athygli á síðustu árum fyrir tónlist sína og gefið út nokkrar breiðskífur og leikið á fjölda tónleika. Margrét Rósa er tuttugu og sjö ára gömul á þessum degi.

Vissir þú að Óttar Felix Hauksson hefur mastersgráðu í íslenskum fræðum?