Afmælisbörn 11. janúar 2022

Guðný Guðmundsdóttir

Fimm tónlistartengd afmælisbörn eiga daginn í dag:

Sigurður Rúnar Samúelsson (Siggi Sam) bassaleikari og fasteignasali frá Ísafirði er fjörutíu og níu ára gamall í dag. Sigurður, sem er af bassaleikaraættum (sonur Samúels Einarssonar í BG & Ingibjörgu) hefur leikið með ýmsum hljómsveitum á ferlinum s.s. Írafári, Hljómsveit Al Deilis, Bravó, Dægurlagakombóinu og Boogie knights svo fáeinar séu hér upp taldar.

Gítarleikarinn Tryggvi (Júlíus) Hübner er sextíu og fimm ára í dag en hann hefur leikið með fjölda sveita í gegnum tíðina, Þjófar, Eik, Þorgils, Aldrei aftur, Bítlarnir, Faraldur, Haukar, Mátturinn og dýrðin, Fjörefni, Cabaret, Blues akademían, Friðryk, Garg, Bárujárn og Áhöfnin á Halastjörnunni eru einungis brot af þeim. Tryggvi hefur einnig gefið út sólóplötur og leikið inn á ógrynni platna með öðrum listamönnum.

Guðný Guðmundsdóttir fiðluleikari er sjötíu og fjögurra ára gömul í dag. Guðný nam fiðluleik hér heima og í Bandaríkjunum og hefur í gegnum tíðina starfað m.a. sem konsertmeistari Sinfóníuhljómsveitar Íslands og hefur komið fram margoft sem einleikari með stærri og smærri sveitum hér heima og erlendis. Hún hefur stofnað og starfað með ýmsum kammersveitum, skipulagt tónleikahátíðir, leikið inn á plötur og unnið til fjölmargra verðlauna og viðurkenninga á ferli sínum.

Unnur Birna Björnsdóttir söngkona, fiðluleikari, tónlistarkennari, útsetjari, tónskáld, kórstjóri og margt annað er þrjátíu og fimm ára gömul í dag. Unnur Birna, sem vakti fyrst athygli sem orgelleikari í sigurframlagi Söngkeppni framhaldsskólanna 2007, á reyndar á ekki langt að sækja tónlistarhæfileikana og hefur leikið með fjölda hljómsveita s.s. Blágresi, 13 tunglum, Ummhmm og mörgum öðrum en hefur jafnframt leikið og sungið á fjölda platna á síðustu árum auk sólóplötu.

Berti Möller (Bertram Henry Möller) söngvari og lögreglumaður (1943-2007) átti einnig afmæli á þessum degi, hann söng með hljómsveitum frá sjötta og fram á áttunda áratug síðustu aldar með sveitum eins og Diskó sextett, Hljómsveit Svavars Gests, Eron, Falcon, Hljómsveit Elfars Berg, KK sextett, Lúdó og Stefán, Sextett Berta Möller og Úranus sextett. Berti lék einnig á bassa í einhverjum ofangreindra sveita.

Vissir þú að Silja Aðalsteinsdóttir þótti efnileg dægurlagasöngkona á sínum yngri árum?