Afmælisbörn 2. apríl 2022

Stefán Örn Arnarson

Þrjú afmælisbörn er á skrá Glatkistunnar að þessu sinni:

Stefán Örn Arnarson sellóleikari er fimmtíu og þriggja ára gamall í dag, hann nam hér heima og í Bandaríkjunum og gaf út plötu árið 1996 með verkum úr ýmsum áttum, þar sem sellóið er í aðalhlutverki. Sellóleik hans er einnig að finna á plötum ýmissa tónlistarmanna eins og títt er um klassísk menntað tónlistarfólk sem bjóðast verkefni af margbreytilegum toga, bæði í klassíska geiranum og í popptónlist.

Einnig á söngkonan, tónskáldið og myndlistakonan Katrína Mogensen afmæli á þessum degi en hún er þrjátíu og þriggja ára gömul. Katrína er auðvitað þekktust fyrir framlag sitt með Mammút sem sigraði Músíktilraunir 2004 en hún var jafnfram kjörin besta söngkona keppninnar það árið. Mammút hefur ennfremur gefið út nokkrar plötur og unnið til fjölda verðlauna. Katrína hefur starfað með ýmsum tónlistarmönnum og hljómsveitum og sungið á plötum Lokbrár, Ingós Veðurguðs, Morðingjanna, Rúnars Þórissonar, Ambáttar og Sykur t.d.

Og svo er það bassaleikarinn Halldór Örn Ragnarsson sem að síðustu er hér nefndur sem afmælisbarn dagsins en hann er fjörutíu og eins árs gamall á þessum degi. Halldór Örn hefur leikið með hljómsveitum á borð við Kimono, Kaktus, 747 og Seabear, og hefur leikið inn á plötur með einhverjum þeirra.

Vissir þú að S.O.S. tríóinu var bannað að auglýsa undir nafni í útvarpinu á sínum tíma vegna þess að erlendir sjómenn sem náðu útsendingunum héldu að hætta væri á ferðum