Afmælisbörn 11. mars 2017

isolfur-palsson

Ísólfur Pálsson

Tvö afmælisbörn í tónlistargeiranum eru á skrá Glatkistunnar að þessu sinni

Þuríður Pálsdóttir óperusöngkona og ein þekktasta söngkona íslenskrar tónlistarsögu er níræð í dag. Þuríður er dóttir Páls Ísólfssonar, lærði söng hér heima og síðan á Ítalíu og þar reis hennar söngferill einna hæst þótt hún hefði alltaf sungið hér heima líka. Fjölmargar plötur komu út hér heima með söng hennar og var plata hennar, Jólasálmar t.a.m. fyrsta íslenska jólabreiðskífan. Frægt er líka samstarf hennar og Guðrúnar Á. Símonar og þekkja margir framlag þeirra, Kattadúettinn. Þuríður sinnti einkum söngkennslu á síðari árum, og var yfirkennari Söngskólans í Reykjavík frá stofnun hans. Hún söng ennfremur í Þjóðleikhúskórnum og stýrði kórum eins og Árnesingakórnum um tíma.

Afi Þuríðar, Ísólfur Pálsson tónskáld, átti þennan sama afmælisdag en hann lést 1941. Ísólfur fæddist 1871 á Stokkseyri og bjó þar og starfaði framan af, hann var kórstjórnandi, tónlistarkennari og hljóðfærasmiður en fyrst og fremst tónskáld og samdi margar söngperlur, þekktust þeirra er án nokkurs vafa Í birkilaut (Draumur hjarðsveinsins).