Afmælisbörn 7. maí 2017

Fjögur afmælisbörn eru á skrá Glatkistunnar á þessum ágæta degi:

Svavar Lárusson söngvari frá Neskaupstað er áttatíu og sjö ára á þessum degi. Svavar söng inn á fjölmargar 78 snúninga plötur hér á árum áður og meðal laga sem urðu vinsæl með honum má nefna Ég vild‘ ég væri og Hreðavatnsvalsinn. Svavar má með rétta telja einn alfyrsta dægurlagasöngvara Íslands.

Ólafur Fannar Vigfússon (Rufaló) frá Kirkjubæjarklaustri er fjörutíu og tveggja ára gamall í dag, hann var á árum áður í hljómsveitum eins og Fljótið sem rann og Vírus auk fleiri sveita en gaf árið 1998 úr sólóplötuna Sykurveröld undir nafninu Rufaló. Ólafur er menntaður kvikmyndagerðarmaður.

Margrét Rán Magnúsdóttir söngkona, gítar- og hljómborðsleikari hljómsveitarinnar Vakar er tuttugu og fimm ára í dag. Vök sigraði eins og kunnugt er Músíktilraunir árið 2013 en Margrét hafði áður starfað með hljómsveitinni Wipeout.

Alfreð Clausen sem rétt eins og Svavar Lárusson telst með fyrstu dægurlagasöngvurum Íslandssögunnar, hefði einnig átt afmæli á þessum degi en hann var fæddur 1918. Plötur Alfreð skipta tugum og lög hans hafa sum hver lifað góðu lífi til dagsins í dag. Þar má nefna Manstu gamla daga, Ömmubæn og Gling gló. Alfreð lést 1981.