Afmælisbörn 29. september 2018

Birgir Þórarinsson (Biggi veira)

Fimm afmælisbörn koma við sögu á skrá Glatkistunnar í dag:

Óli Ágústsson söngvari er áttatíu og tveggja ára gamall í dag, hann var einn þeirra fyrstu sem lagði rokksöng fyrir sig á Íslandi á seinni hluta sjötta áratug síðustu aldar. Hann var iðulega kallaður Óli rokkari eða Óli Presley en hann sérhæfði sig í lögum Elvis Presley, síðar varð hann áberandi í tónlist trúarlegs eðlis en hann veitti meðal annars hvítasunnusöfnuðinum Samhjálp forstöðu.

Bassaleikarinn og söngvarinn góðkunni Pálmi Gunnarsson er sextíu og átta ára í dag en sá hefur komið harla víða við á sínum ferli. Þar má fyrst nefna blómlegan sólóferil en einnig samstarf með Magnúsi Eiríkssyni og fleirum í Mannakornum, Friðryk, Póker, Brunaliðið, Blúskompaníið, Hljómsveit Magnúsar Ingimarssonar og Icy hópurinn en í því síðast talda var Pálmi einmitt í fyrsta Eurovision hópnum margfræga sem söng Gleðibankann árið 1986.

Birgir Þórarinsson eða bara Bigga veira er fimmtugur í dag og telst því eiga stórafmæli dagsins. Hann er einn af fremstu tónlistarmönnum okkar í dans-, ambient- og technogeiranum og hefur starfað með sveitum eins og T-World og Gus Gus en með síðarnefndu sveitinni hefur hann starfað frá upphafi og var einn af stofnendum hennar.

Ari Agnarsson tónlistarmaður er fimmtíu og átta ára á þessum degi en hann hefur leikið á flest hljóðfæri frá harmonikkum til trommusetta í hljómsveitum eins og Rósinni okkar, Misgenginu og Mandala. Ari hefur ennfremur unnið við upptökur á plötum hljómsveitarinnar Plútó sem skipuð er fötluðum einstaklingum en hann starfar einmitt hjá Fjölmennt við tónlistarkennslu.

Jóhannes G. Jóhannesson tónlistarmaður (1901-88) hefði einnig átt afmæli á þessum degi en hann kom að ýmsum hliðum tónlistarinnar, hann lék á harmonikku bæði einn og með hljómsveitum, samdi tónlist og annaðist einnig hljóðfæraviðgerðir. Hann varð svo frægur að leika inn á fyrstu plötu á Íslandi sem hafði að geyma „danstónlist“ en það var árið 1933.

Auglýsingar