Afmælisbörn 19. september 2019

Finnbogi Kjartansson

Afmælisbörn Glatkistunnar eru fimm að þessu sinni:

Finnbogi G. Kjartansson bassaleikari frá Keflavík er sextíu og sjö ára gamall en hann lék með ýmsum Suðurnesjasveitum á sínum yngri árum, oft með bróður sínum Magnúsi. Meðal sveita sem Finnbogi lék með voru Júdas, Júbó, Echo, Steinblóm, Ábót, Fresh, Geimsteinn og Hrókar en sú síðast talda var líkast til fyrsta sveitin sem hann lék með.

Jóhann (Gunnar) Jóhannsson tónskáld hefði orðið fimmtugur í dag en hann lést á síðasta ári. Flestir þekkja hans framlag hans til kvikmyndatónlistar í Bandaríkjunum þar sem hann starfaði síðustu ár sín og hlaut margs kyns viðurkenningar. Jóhann var ennfremur öflugur í jaðarsenunni hér heim áður fyrr og lék þá með fjölda sveita eins og Unun, Ham, Apparat organ quartet, Big band brutal, DIP, Lhooq, Daisy hill puppy farm, Autobahn og Funkstrasse, svo aðeins fáein nöfn séu nefnd.

Bjarni Daníel Þorvaldsson söngvari og gítarleikari Bagdad brothers er tuttugu og tveggja ára gamall á þessum degi. Bjarni Daníel hefur einnig starfað með hljómsveitum eins og Skoffín og Váru, og söng á sínum tíma með sönghópnum Mr. Norrington (Skápakvartettnum).

Þá hefði Þórunn Frans (Sigríður Þórunn Franzdóttir) (1931-2018) átt afmæli á þessum degi en hún vakti athygli fyrir lagasmíðar á sjötta og sjöunda áratug liðinnar aldar, einhverjar þeirra unnu til viðurkenninga og verðlauna í sönglagakeppnum SKT. Ragnar Bjarnason gaf m.a. út fjögurra laga plötu með lögum eftir Þórunni  og voru lögin Farmaður hugsar heim og Föðurbæn sjómannsins meðal þeirra.

Carl Möller píanó- og hljómborðsleikari (1942-2017) átti einnig þennan afmælisdag. Hann starfaði í gegnum tíðina með fjöldanum öllum af danshljómsveitum og meðal þeirra má nefna Neo tríóið, Sextett Ólafs Gauks, Fimm í fullu fjöri, Hljómsveit Hauks Morthens, Diskó sextett og Sumargleðinni. Carl samdi einnig  tónlist og platan Októberlauf hefur einmitt að geyma lög hans, aukinheldur lék hann inn á fjölda platna og fékk við að kenna tónlist.